Diplomatët kinezë i janë drejtuar Bashkimit Evropian me një propozim për të marrë pjesë në forcat paqeruajtëse në territorin e Ukrainës. Pjesëmarrja e Kinës në nismë mund të rrisë presionin ndaj Rusisë në negociata, raporton botimi gjerman Welt am Sonntag, duke cituar burime.
“Diplomatët kinezë në Bruksel kanë hetuar nëse një veprim i tillë do të ishte i imagjinueshëm dhe ndoshta edhe i dëshirueshëm nga një perspektivë evropiane,” thotë botimi .
Përfshirja e Kinës në të ashtuquajturin koalicion të vullnetarëve – një grup vendesh që dëshirojnë të dërgojnë ushtarë në Ukrainë pas përfundimit të luftës – mund të bëjë më shumë gjasa që Rusia të pranojë një prani paqeruajtëse në Ukrainë, thanë burimet e gazetës në qarqet diplomatike evropiane.
Krijimi i një “koalicioni të vullnetarëve” u njoftua në fillim të marsit pas samitit të shteteve evropiane në Londër. Në atë kohë, kryeministri britanik Keir Starmer njoftoi se misioni do të drejtohej nga Britania e Madhe dhe Franca. Samiti i koalicionit është caktuar për më 27 mars.
Kremlini ka deklaruar vazhdimisht se e konsideron të papranueshme praninë e trupave të NATO-s në territorin ukrainas.
Në shkurt, revista Economist, duke cituar burime , deklaroi se për të rritur besimin mes palëve, administrata e presidentit amerikan Donald Trump propozon të ftojë në kontigjentin paqeruajtës vende me marrëdhënie të mira me Rusinë, si Kina dhe Brazili.
