Imamoglu u arrestua të mërkurën dhe arrestimi i tij shkaktoi protesta masive në Stamboll.
Autoritetet turke urdhëruan arrestimin e Imamoglu të mërkurën për korrupsion dhe terrorizëm dhe tani një gjykatë ka vendosur që ai duhet të qëndrojë pas hekurave deri në gjyq. Kjo mund të shkaktojë protestat më të mëdha në vend në 10 vjet.
Imamoglu dhe 20 persona të tjerë dyshohen për korrupsion dhe përvetësim, ndërsa kryebashkiaku i Stambollit dyshohet edhe për terrorizëm, ndonëse autoritetet turke nuk kanë sqaruar detajet e kësaj akuze.
Një gjykatë e Stambollit përfundimisht e la atë në paraburgim vetëm me dyshimin për korrupsion, ndërsa akuzat e tjera janë ende duke u hetuar.
Reuters thekson se vendimi për të ndaluar Imamoglun dhe për ta dërguar në burg erdhi pasi partia kryesore opozitare e Turqisë kritikoi procedurat kundër kryetarit të Stambollit si të politizuara, të cilat u mbështetën nga shumë liderë evropianë dhe dhjetëra mijëra protestues.
Partia e Imamoglu po zhvillon sot zgjedhjet e brendshme për të përzgjedhur kandidatin e saj për zgjedhjet e ardhshme presidenciale në Turqi.
Imamoglu është një favorit i madh dhe pritet të marrë mbështetje të mjaftueshme për të kandiduar kundër kundërshtarit të tij politik dhe presidentit turk Rexhep Tajip Erdogan në vitin 2028.
