I dyshuari për vrasjen e 19-vjeçarit në Vushtrri ka pranuar se ka kryer veprën. Zëdhënësi i Prokurorisë Themelore në Mitrovicë, Valon Preteni ka bërë të ditur se i dyshuari B.D gjatë intervistimit ka pranuar veprën por që është ende herët për motin që ka çuar në vrasjen e të riut.
“Gjatë intervistimit ai e ka pranuar se e ka kryer vrasjen. Hetimet po zhvillohen dhe është herët të flitet për motivet”, ka theksuar Preteni për RTKlive.
Preteni ka theksuar se brenda afatit te paraparë ligjor prokuroria do të paraqes kërkesën për caktim paraburgimit.
“Lidhur me rastin e ndodhur mbrëmë në Vushtrri është arrestuar një i dyshuar, dhe i njëjti me vendim të prokurorit gjendet në ndalim 48 orësh. Është sekuestruar arma me të cilën dyshohet se është kryer kjo vrasje, Prokuroria dhe policia janë duke mbledhur provat relevante në lidhje me rastin. Gjatë marrjes së deklaratës i dyshuari e ka pranuar fajësinë për vrasjen. Në afatin e paraparë ligjor prokuroria do të paraqesë kërkesë për caktimin e masës së paraburgimit ndaj të dyshuarit për këtë rast. Gjatë hetimit do të zbulohen edhe motivet që quan në këtë ngjarje”, ka thënë ai.
Një 19-vjeçar u vra mbrëmë në Vushtrrisë nga një bashkëmoshatar i tij. I vrarë mbeti 19-vjeçari me inicialet A.Z., kurse i dyshuari është poashtu 19-vjeçar me inicialet B.D.
Policia e Kosovës ka bërë të ditur se ka arrestuar të dyshuarin, ndërsa atij i është bastisur edhe shtëpia ku i është gjetur edhe një armë e gjatë me pesë fishekë.
“Nga hetimet e kryera në vendin e ngjarjes dhe ekzaminimet e kryera, hetuesit policor si prova materiale kanë gjetur dhe sekuestruar tri (3)gëzhoja. Hetuesit policorë kanë identifikuar dhe arrestuar të dyshuarin B. D., 19 vjeçar nga i cili është konfiskuar një armë pistoletë që dyshohet të jetë përdorur nga i dyshuari në kryerjen e veprës penale. Në shtëpinë e të dyshuarit është realizuar bastisje ku është gjetur dhe konfiskuar edhe një armë e gjatë me pesë (5) fishek. Me aktvendin të porokurorit të dyshuarit i është caktuar masa e ndalimit policor”, thuhej mes tjerash në komunikatën e policisë.
