Shkruan: Hyzri SALIHU
Një udhërrëfyes për forcimin e ndërgjegjes kombëtare dhe gatishmërisë për mbrojtjen e atdheut.
TË JEMI MIRËNJOHËS NDAJ HISTORISË SONË
Historia jonë është dëshmi e sakrificave të mëdha dhe e luftës së pandërprerë për mbijetesë, liri dhe dinjitet kombëtar. Ne duhet të jemi gjithmonë mirënjohës ndaj brezave të kaluar që mbajtën gjallë gjuhën, kulturën dhe aspiratat tona për liri.
- Kujtimi i heronjve dhe dëshmorëve të kombit nuk duhet të mbetet vetëm në fjalë, por të përkthehet në veprime konkrete për mbrojtjen dhe zhvillimin e Shqipërisë.
- Çdo shqiptar ka detyrimin moral dhe kombëtar të mbajë gjallë historinë dhe të mësojë të vërtetën e saj, pa lejuar deformime nga armiqtë tanë.
TË MBROJMË GJUHËN, KULTURËN DHE TRASHËGIMINË
Gjuha shqipe është pasuria jonë më e çmuar dhe elementi që na ka mbajtur të bashkuar si komb ndër shekuj.
- Duhet të flasim dhe të shkruajmë gjuhën tonë me krenari dhe ta përcjellim atë tek brezat e rinj pa ndikime të huaja që e varfërojnë atë.
- Duhet të ruajmë dhe të promovojmë trashëgiminë tonë kulturore, nga këngët e vjetra deri te monumentet historike, duke mos lejuar që ato të harrohen apo të shkatërrohen nga moskujdesi.
- Çdo shqiptar, pavarësisht se ku jeton, ka detyrimin të ruajë identitetin e tij dhe të mos asimilohet nga kulturat e huaja.
TË NDEROJMË DËSHMORËT DHE HERONJTË E KOMBIT
Liria dhe ekzistenca jonë si komb nuk do të ishin të mundshme pa gjakun e derdhur nga dëshmorët dhe luftëtarët e shqiptarëve ndër shekuj.
- Duhet të nderojmë luftën heroike të UÇK-së, të cilët me sakrificën e tyre i dhanë Kosovës lirinë dhe hapën rrugën drejt shtetformimit.
- Lufta që tregoi vendosmërinë e UÇK-së për të mbrojtur popullin shqiptar, duhet të jetë një nga simbolet tona të përjetshme.
- Respekti për heronjtë duhet të shfaqet përtej përkujtimoreve; ai duhet të reflektohet në përkushtimin për të vazhduar idealet e tyre.
TË JEMI TË BASHKUAR SI KOMBITET E FORTA
Ndarjet brenda kombit tonë kanë qenë dhe mbeten një nga sfidat më të mëdha që e kanë dobësuar Shqipërinë dhe trojet shqiptare.
- Nuk duhet të lejojmë përçarje mbi baza politike, fetare apo krahinore. Shqipëria Etnike është një dhe duhet të qëndrojë e tillë.
- Forcimi i unitetit kombëtar është çelësi për mbijetesën dhe suksesin tonë si popull. Një komb i ndarë është një komb i dobët.
- Interesi kombëtar duhet të jetë mbi çdo interes personal apo partiak. Ata që e dëmtojnë Shqipërinë për përfitime personale nuk mund të konsiderohen patriotë.
TË EDUKOJMË GJENERATAT E REJA ME NDJENJË ATDHEDASHURIE
Një komb që nuk i mëson fëmijët dhe të rinjtë e tij për historinë dhe sakrificat e të parëve është një komb i destinuar për të humbur.
- Sistemi arsimor duhet të përmbajë histori të vërtetë kombëtare, jo të manipuluar nga interesa të huaja.
- Rinia duhet të frymëzohet nga figura kombëtare dhe të ndërgjegjësohet për përgjegjësitë që ka për të ardhmen e atdheut.
- Çdo shqiptar duhet të mësojë që dashuria për atdheun nuk është vetëm fjalë, por veprim konkret në mbrojtjen dhe zhvillimin e vendit.
TË JEMI TË GATSHËM PËR MBROJTJEN E ATDHEUT
Një komb i fortë është ai që ka qytetarë të ndërgjegjshëm dhe të gatshëm për të mbrojtur veten dhe atdheun.
- Duhet të kemi një ushtri të fuqishme dhe të përgatitur për çdo kërcënim të jashtëm apo të brendshëm.
- Çdo shqiptar duhet të ketë një kulturë bazë ushtarake, të njohë teknikat e vetëmbrojtjes dhe të jetë i gatshëm për mbrojtjen e vendit në raste rreziku.
- Forcimi i sigurisë kombëtare është thelbësor për të mbrojtur sovranitetin dhe stabilitetin tonë.
TË MBROJMË INTERESAT KOMBËTARE NË ÇDO ARENË
Shqiptarët, kudo që ndodhen, duhet të jenë ambasadorë të kombit të tyre dhe të mbrojnë interesat shqiptare në çdo fushë.
- Në politikën ndërkombëtare, duhet të kemi një qëndrim të fortë për të mbrojtur çështjen shqiptare.
- Në ekonomi, duhet të mbështesim bizneset dhe prodhimet shqiptare, duke forcuar ekonominë tonë kombëtare.
- Në mediat dhe rrjetet sociale, duhet të kundërshtojmë dezinformimin dhe propagandën që synon dëmtimin e imazhit të shqiptarëve.
TË JEMI MIKPRITËS DHE SOLIDARË ME SHQIPTARËT KUDO
Një komb i fortë është ai që qëndron pranë vëllezërve të tij në çdo situatë.
- Diaspora shqiptare ka një rol të madh në zhvillimin e kombit dhe duhet të mbështetet, jo të përjashtohet.
- Nuk duhet të ketë shqiptarë të braktisur; secili prej nesh ka detyrimin të ndihmojë bashkëkombësit e tij në nevojë.
TË MOS HARROJMË ASNJË PJESË TË TROJEVE SHQIPTARE
Shqiptarët nuk janë vetëm brenda kufijve të Shqipërisë dhe Kosovës, por edhe në trojet tona historike që padrejtësisht janë shkëputur nga trungu kombëtar.
- Çështja e shqiptarëve në Maqedoninë e Veriut, Mal të Zi, Preshevë dhe Çamëri nuk duhet të harrohet.
- Duhet të punojmë për të drejtat e shqiptarëve kudo dhe të mos lejojmë asimilimin e tyre.
TË PUNOJME PËR NJË TË ARDHME KU SHQIPËRIA ETNIKE TË JETË REALITET
Bashkimi kombëtar nuk është vetëm një aspiratë historike, por një domosdoshmëri për forcimin e kombit shqiptar.
- Përmes diplomacisë, zhvillimit ekonomik dhe fuqizimit të shteteve shqiptare, ne duhet të punojmë për Shqipërinë Etnike.
- Vetëm një Shqipëri e bashkuar mund të garantojë sigurinë dhe të ardhmen e shqiptarëve.
Ky Dekalog le të jetë një udhëzues për çdo shqiptar që dëshiron të mbrojë kombin, lirinë dhe të ardhmen tonë të përbashkët!
