Lëvizja Vetëvendosje ka publikuar sot një video promovuese, ku thekson sipas saj “sukseset e rëndësishme” të Qeverisë Kurti II dhe paralajmëron vazhdimësinë e saj me formimin e Qeverisë Kurti III. Në fund të klipit, partia fituese e zgjedhjeve të 9 shkurtit deklaron se “Qeveria Kurti III po vjen”.
Ndonëse ky postim duket si paralajmërim i Vetëvendosjes për një qeverisje të re, aktualisht nuk ka ndonjë përpjekje konkrete për formimin e saj. Me 48 deputetë të siguruar në Kuvend, Vetëvendosje nuk ka shumicën e nevojshme për të qeverisur e vetme. RTK ka pyetur në Vetëvendosje nëse kanë nisur takimet me partitë tjera, por ata nuk janë përgjigjur.
Nga ana tjetër, PDK, LDK dhe AAK kanë zhvilluar takime për formimin e qeverisë, mirëpo për hapa konkret po presin certifikimin e rezultateve, dhe më pas fituesi i zgjedhjeve do të provojë të formojë qeverinë.
Të tria këto parti politike kanë përjashtuar një koalicion me Vetëvendosjen, ndërsa preferojnë një koalicion mes tyre. Megjithatë, siç mëson RTK, bashkëpunimi mes partive opozitare po pengohet nga kërkesat e Lidhjes Demokratike të Kosovës, e cila po kushtëzon çdo marrëveshje me marrjen e postit të kryeministrit.
Ndaj videos promovuese të Vetëvendosjes ka reaguar nënkryetarja e Partisë Demokratike të Kosovës, Vlora Çitaku. Përmes një postimi në rrjetet sociale, Çitaku ka kritikuar ashpër qeverisjen e Vetëvendosjes, duke e akuzuar atë për mungesë zhvillimi dhe përkeqësim të gjendjes ekonomike në vend. Sipas saj, ekzekutivi i drejtuar nga Albin Kurti nuk ka sjellë mirëqenie, por vetëm rritje çmimesh dhe faturash.
“Produktet bazike janë luks. Energjinë elektrike luks po ashtu. Në çdo fushë tjetër: stagnim, dështim dhe degradim. Por për ta, mjafton të flasin. Se fjala është e lirë, ndërsa përgjegjësia, duket, u është e huaj,” ka deklaruar Çitaku.
Procesi i certifikimit të rezultateve zgjedhore është ende në pritje, pasi Gjykata Supreme po shqyrton dy ankesa – një nga Vetëvendosje kundër LDK-së dhe tjetra nga koalicioni PDAK-LPB kundër Partisë së Ashkalinjve për Integrim. Vendimi i Supremes pritet të merret brenda afatit ligjor, deri nesër.
