Prokuroria Themelore në Gjakovë, ka ngritur aktakuzë kundër të pandehurit me inicialet K.Z., për veprat penale “Vrasja e rëndë e mbetur në tentativë” dhe “Mbajtja në pronësi, kontroll ose posedim të paautorizuar të armëve”, ndërsa për të pandehurin me inicialet V.K., për veprën penale “Lëndimi i lehtë trupor”.
Në aktakuzë thuhet se i pandehuri K.Z. më 10 janar të këtij viti në një lokal në fshatin Tërpezë, të komunës së Malishevës, me dashje ka tentuar të privojë nga jeta të dëmtuarin V.K., duke vënë në rrezik edhe jetën e personave të tjerë.
Në detajet që ka bërë të ditura prokuroria rreth kësaj tentim vrasjeje, i pandehuri pas një mosmarrëveshje të momentit që pasoi me përleshje fizike, kishte nxjerrë nga brezi armën për të shtënë drejt personit me të cilin u përleshën, por ishte penguar nga një tjetër person i pranishëm aty, E.B., i cili i kishte vënë dorën mbi revole. I pandehuri kishte shtënë një herë, por që gjatë asaj gjuajtje, sipas detajeve të prokurorisë, lëndohet i dëmtuari E.B., në dorë të djathtë.
Me këto veprime Prokuroria Themelore në Gjakovë thotë se i njëjti ka kryer veprën penale “Vrasja e rëndë e mbetur në tentativë”, dhe veprën penale “Mbajtja në pronësi, kontroll ose posedim të paautorizuar të armëve”.
Prokurori i çështjes me rastin e ngritjes së aktakuzës, i ka propozuar gjykatës që të pandehurit të shpallën fajtor dhe të dënohen sipas ligjit për veprat penale të cilat ju vihen në barrë.
