Nënkryetari i Lidhjes Demokratike të Kosovës (LDK), Lutfi Haziri, ka mohuar zërat për një krizë të brendshme në parti, duke theksuar se brenda LDK-së ka një debat të hapur dhe të nevojshëm për të ardhmen e saj.
“Nuk ka krizë brenda LDK-së, ka debat. Një debat që është thirrur nga kryetari i LDK-së dhe që ka shtjerrë fazën e parë të diskutimit të brendshëm. Ne kemi analizuar numrat, çështjet, rolin tonë, angazhimet dhe pritjet që kemi krijuar,” ka deklaruar Haziri.
Ai në Debat Plus, ka theksuar se ky proces është pjesë e reflektimit të partisë dhe përgatitjeve për zgjedhjet lokale, duke u siguruar që LDK-ja të nxjerrë mësime nga procesi i kaluar.
Sa i përket diskutimeve për ndryshim të lidershipit, Haziri ka konfirmuar se Avdullah Hoti ka publikuar qëndrimin e tij pas mbledhjes së fundit, ndërsa kryetari i partisë, Lumir Abdixhiku, ka shprehur gatishmërinë për të thirrur Kuvendin nëse anëtarësia e kërkon një gjë të tillë.
“Qëndrimi për ndryshimin e lidershipit, nga Avdullah Hotit, ka qenë pas mbledhjes së fundit, qëndrimin e tij e ka pasur edhe në mbledhje. Kërkesa e Abdixhikut, ka qenë se nëse iu vlerësoni me thirr kuvendin unë jam i gatshëm ta thërras Kuvendin, por askush nuk ka dalë me status të thotë se Lumiri ka thënë ashtu”, ka deklaruar ai.
“Unë kam thënë që partia nuk i takon funksionarëve, por anëtarësisë. Çështjet që diskutohen brenda kanë për qëllim përmirësimin. Asnjë proces zgjedhor nuk mund të jetë produktiv pa prodhuar emra të rinj”, ka deklaruar mes tjerash Haziri.
