Kryeministri i Kosovës, Albin Kurti, ka shprehur shqetësimin e tij lidhur me katër vrasjet që ndodhën brenda tre ditëve të fundit në Kosovë.
Ai nga mbledhja e qeverisë u bëri thirrje organeve të rendit, hetuesisë e drejtësisë që të trajtojnë me seriozitetin më të lartë shkaqet, rrethanat dhe predispozitat e dorasëve, në mënyrë, siç tha ai, që edhe të vihet drejtësi edhe të parandalohen raste të tilla në të ardhmen.
“Vrasja është akti më i rëndë që mund t’ia bëjë njeriu-njeriut, ajo asnjëherë nuk guxon të normalizohet. Vrasja është jo vetëm vrasje e njeriut, por edhe e shoqërisë në të cilën ai njeri bënte pjesë, pra shoqërisë sonë. Gjithë vendi është tronditur e lënduar nga kjo seri e vrasjeve që duhet të ndalohet, ndalet e dënohet. Na duhet analizë e kujdesshme profesionale, veprim i menjëhershëm institucional dhe reflektim shoqëror që adreson dhunën që kemi parë në këto ditët e fundit”, tha kreu qeveritar.
Tutje Kurti tha se kjo është thirrje për të gjithë. “Edhe për faktin se këto vrasje ndodhën në javën kur shënojmë 26 vjetorin e fushatës së bombardimeve të NATO-s në Kosovë për të ndalë gjenocidin e Serbisë dhe përkujtojmë masakrat e njëpasnjëshme të aparatit shtetëror të Serbisë që synonte shfarosjen e popullit shqiptar”, tha shefi qeveritar teksa tregoi që bashkë me kolegë të kabinetit do të jetë në Krushë të Madhe e të Vogël për përkujtim të masakrave atje.
Kreu qeveritar u ka shprehur ngushëllime familjeve të viktimave dhe ka ritheksuar kërkesën për angazhim maksimal të organeve të rendit dhe drejtësisë.
