Kryetari i Aleancës për Ardhmërinë e Kosovës, Ramush Haradinaj, sot në Obiliq, ka nderuar kujtimin për të rënët e familjes Rama. Ai ka thënë se ata qëndruan heroikisht deri në frymën e fundit, duke rezistuar ndaj zjarrit, për të dhënë jetën për lirinë e Kosovës, bashkë me anëtarët e tjerë të familjes.
“Në fund të marsit 1999, aparati gjenocidal serb ishte mobilizuar në të gjithë Kosovën, duke shtuar dhunën dhe mizoritë ndaj popullsisë shqiptare. Më 27 mars, forcat serbe sulmuan shtëpinë e Agron Ramës. Ai, bashkë me djemtë e tjerë të familjes; Farukun dhe Albertin, iu përgjigj me zjarr armikut, duke luftuar për mbrojtjen e familjes dhe atdheut. Ata qëndruan heroikisht deri në frymën e fundit, duke rezistuar ndaj zjarrit, për të dhënë jetën për lirinë e Kosovës, bashkë me anëtarët e tjerë të familjes”, ka shkruar Haradinaj në Facebook.
Ai ka shkruar se shembulli i familjes Rama dëshmon se kur atdheu është në rrezik, nuk kursehet asgjë nga vetja.
“Në këtë përvjetor, kujtojmë gjithashtu mbi 180 martirë të lirisë nga Fushë-Kosova”.
Ai ka përmendur edhe krimet serbe në Pejë dhe bombardimin e radiostacionit “Kosova e Lirë”, ku ra dëshmor Elbasan Berisha.
“Në këtë ditë të kobshme, egërsia barbare u shpërfaq edhe në lagjen Dardania dhe në të gjithë qytetin e Pejës. Ndërkohë, makineria vrastare serbe goditi në Malet e Berishës, duke bombarduar zërin e Ushtrisë Çlirimtare të Kosovës – radiostacionin “Kosova e Lirë”, ku ra dëshmor Elbasan Berisha. Derisa nderojmë dëshmorët dhe martirët, kujtojmë se sa e shtrenjtë është liria që gëzojmë sot. Ishte lufta jonë çlirimtare ajo që na solli aleancën me NATO-n, të udhëhequr nga Amerika. Përgjithmonë të përulur para sakrificës së të rënëve për liri!”, ka shkruar Haradinaj.
