“Kosovës dhe rajonit rreziku i vjen nga Serbia, si i vetmi shtet që ka bashkëpunim intensiv politik dhe ushtarak me Rusinë dhe Kinën, gjë që bie ndesh me rrugën evropiane dhe demokratizuese të rajonit”, ka thënë kryetari Kuvendit, Glauk Konjufca, gjatë takimit që pati me delegacionin e pjesëmarrësve në Kursin e Lartë të Sigurisë dhe Mbrojtjes, që udhëhiqej nga drejtori i Kolegjit të Mbrojtjes dhe Sigurisë, gjenerali, Ylli Pulaj.
Konjufca ka shprehur mirënjohje për këtë kurs, që është më i larti në hierarkinë e arsimit të Forcave të Armatosura të Republikës së Shqipërisë, në edukimin dhe kualifikimin e personelit ushtarak dhe civil, e në rritjen e kapaciteteve të brendshme, në mbrojtjen dhe sigurinë e përbashkët.
“Njëkohësisht, kryetari Konjufca e cilësoi këtë kurs përbrenda gamës së thellimit të mëtejshëm të bashkëpunimit mes Republikës së Kosovës dhe Republikës së Shqipërisë, por edhe në kuadër të ngritjes së kapaciteteve përgjatë rrugës së Kosovës për anëtarësim në NATO”, thuhet në njoftimin e Kuvendit të Kosovës rreth takimit.
Kryetari Konjufca tutje ka thënë se vazhdimi në këto hapa nxit profesionalizimin, bashkëpunimin dhe përafrimin gjithnjë e më të madh në fusha të rëndësishme si ajo e mbrojtjes dhe sigurisë, që sipas tij, merr vlerë edhe më të madhe duke konsideruar kërcënimet që i sjell rajonit dhe sigurisë evropiane në përgjithësi pushtimi i Rusisë në Ukrainë.
