Kryetari i Komunës së Prishtinës, Perparim Rama, ka njoftuar se Samir Shahini është emëruar drejtor i arsimit.
Rama ka thënë se Shahini ka mbi një dekadë përvojë në menaxhimin e arsimit dhe zhvillimin e politikave edukative.
“Angazhimi i tij është fokusuar në promovimin e cilësisë në arsim. Ndër vite ka kontribuar në projekte edukative dhe sociale, duke punuar me organizata ndërkombëtare dhe vendore”, ka thënë Rama.
Rama tutje ka shtuar se përvoja e Shahinit në trajnime, analizë të politikave arsimore dhe ndërtimin e strategjive të zhvillimit e bëjnë Shahinin një kuadër të përgatitur për përmirësimin e arsimit në kryeqytet.
Sipas Ramës vizioni dhe angazhimi i Shahinit janë në harmoni me synimet e Komunës për ngritjen e cilësisë në shkolla dhe zgjerimin e reformës të mësimit tërëditor.
Rama gjithashtu ka falënderuar drejtoreshën e deritanishme të arsimit, Jehona Lushaku, për punën e mrekullueshme që ka bërë këto vite, e po ashtu i ka uruar që angazhimi dhe përkushtimi i saj të vazhdojë me sukses në Kuvendin e Kosovës si deputete.
