26 vjet më parë në shtëpinë e familjes Vejsa në lagjen e parë në Gjakovë ndodhi një nga masakrat më mizore. Aty u vranë e pastaj u dogjën 20 gra e fëmijë dhe një burrë.
Presidentja e shtetit, Vjosa Osmani e ka quajtur këtë si një nga krimet më të tmerrshme të regjimit gjenocidal të Serbisë.
“20 gra, fëmijë dhe një burrë –janë viktimat, të cilat u vranë mizorisht dhe më pas u dogjën, në një akt të pashpirt që synonte të shuante jo vetëm njerëzit, por edhe kujtesën e tyre. Por kujtesa nuk shuhet. Emrat e tyre mbeten të gdhendur në historinë e Kosovës si dëshmi e dhimbjes sonë kolektive dhe forcës për të kërkuar drejtësi. Familjet Vejsa, Caka, Haxhiavdija, Nuqi, Hoxha dhe Gashi nuk ishin thjesht viktima të një regjimi kriminal, po dëshmitare të guximit dhe sakrificës që sot frymëzon angazhimin tonë për të vërtetën dhe drejtësinë”, shkroi presidentja
Në këtë përvjetor, thotë ajo, përkulen me respekt përpara kujtimit të tyre duke ripërsëritur thirrjen që secili që urdhëroi dhe kreu këto krime, duhet të ndëshkohet.
“Dhembja mbetet, por bashkë me të edhe përkushtimi ynë që këto krime të mos harrohen kurrë. Lavdi kujtimit të tyre!”, ka shkruar në kujtimin e saj për këtë masakër, presidentja, Osmani.
