NATO është këtu për të qëndruar dhe Shtetet e Bashkuara kanë konfirmuar vazhdimisht angazhimin e tyre ndaj NATO-s dhe nenit 5 për mbrojtjen e ndërsjellë, tha sot Sekretari i Përgjithshëm i Aleancës Mark Rutte. “Jam absolutisht i bindur se aleanca është këtu për të qëndruar. Përkushtimi i tyre është absolutisht i qartë,” tha Rutte në një konferencë shtypi në Bruksel.
Megjithatë, ai shtoi se SHBA-ja njëkohësisht pret që aleatët evropianë dhe Kanadaja të rrisin shpenzimet e mbrojtjes në dy për qind të PBB-së e lart, gjë që, sipas Rutte, tashmë po ndodh.
Përgatitjet për takimin ministror dhe samitin në Hagë
Sekretari i Përgjithshëm mbajti një konferencë për shtyp para takimit dyditor të ministrave të jashtëm të vendeve anëtare nesër dhe pasnesër në Bruksel. Ata do të diskutojnë sfidat e sigurisë, forcimin e mbrojtjes kolektive dhe përgatitjet për samitin e aleancës më 24 dhe 25 qershor në Hagë.
Sekretari amerikan i Shtetit Marco Rubio merr pjesë për herë të parë në takim. Është planifikuar gjithashtu një takim i Këshillit NATO-Ukrainë.
Mbështetje për Ukrainën në dritën e kërcënimit rus
Rutte tha se aleatët kanë premtuar më shumë se 20 miliardë dollarë ndihmë ushtarake për Ukrainën në tre muajt e parë të këtij viti.
“Kërcënimi me të cilin përballemi nga Rusia mbetet dhe Rusia vazhdon të punojë ngushtë me Kinën, Iranin dhe Korenë e Veriut në një mënyrë që jo vetëm që dëmton Ukrainën, por përbën rrezik për NATO-n dhe të gjithë botën”, tha Rutte.
