Ministri i Punëve të Brendshme, Xhelal Sveçla, ka takuar Sekretarin e Jashtëm të Mbretërisë së Bashkuar, David Lammy, me të cilin thuhet se biseduan për fusha të përbashkëta të bashkëpunimit ndërmjet dy vendeve, me theks të veçantë për fushën e sigurisë.
“Sveçla e falënderoi Mbretërinë e Bashkuar për mbështetjen e vazhdueshme që kanë dhënë për Republikën e Kosovës në shumë etapa të shtetndërtimit, ndërsa sa i përket sektorit të sigurisë, ministri Sveçla theksoi se Mbretëria e Bashkuar është ndër partnerët strategjikë që vazhdon të mbështesë Kosovën në fushën e sigurisë”, thuhet në njoftimin e ministrisë.
Në këtë takim, ministri Sveçla i tregoi mysafirit të lartë britanik për angazhimin që institucionet e Kosovës bëjnë sa i përket luftimit të migracionit të parregullt, dhe për këtë, MPB i ka treguar atij se ka ngritur trupa të veçantë që janë duke i ndjekur trendet më të fundit të migracionit, të cilët edhe janë duke marrë veprimet e nevojshme për të luftuar këtë dukuri.
Ndërsa, sipas ministrisë, Sekretari i Jashtëm i Mbretërisë së Bashkuar vlerësoi progresin në Kosovë duke ritheksuar mbështetjen e vazhdueshme të Qeverisë së Britanisë për Kosovën, sa i përket përforcimit të mekanizmave të sigurisë.
Gjatë kësaj vizite u prezantua donacioni i Mbretërisë së Bashkuar, pajisje për Kontrollin dhe Menaxhimin e kufirit shtetëror të Kosovës, si dhe pajisje për Qendrën Kombëtare për Menaxhimin Kufitar.
