Presidenti amerikan Donald Trump ka njoftuar vendosjen e një tarife minimale prej 10% për të gjitha importet në SHBA, duke e cilësuar këtë masë si të domosdoshme për “rindërtimin” e ekonomisë amerikane. Kjo tarifë do të përfshijë një gamë të gjerë vendesh, përfshirë edhe Kosovën.
Gjatë një konference, Trump prezantoi një tabelë me tarifat e reja, ku Britania e Madhe do të përballet me një tarifë prej 10%, ndërsa Bashkimi Evropian me 20%. Ai kritikoi BE-në, Kinën dhe Indinë, duke i akuzuar për politika tregtare të padrejta ndaj SHBA-së.
“Na grabisin, është e trishtueshme dhe e mjerueshme,” tha Trump, duke mbrojtur vendimin e tij për reciprocitet në tregtinë ndërkombëtare.
Në listat e publikuara të shteteve që SHBA-ja u ka vënë tarifa, figuron edhe Kosova me 10 për qind tarifa. Derisa, vendet e tjera të rajonit figurojnë në këtë përqindje tarifash: Shqipëria 10%, Mali i Zi 10%, Serbia 37%, Maqedonia e Veriut 33%, Bosnja e Hercegovina 35%. 
Trump vendos tarifë 25% mbi automjetet e importuara
Gjatë një fjalimi në Kopshtin e Trëndafilave, Trump theksoi se SHBA është shfrytëzuar për dekada nga tarifat e larta të vendosura nga vendet e tjera, veçanërisht Japonia dhe Koreja e Jugut, raporton BBC.
Ai kritikoi praktikat e padrejta tregtare dhe tha se masat e tjera, përfshirë barrierat jo-monetare, kanë dëmtuar industrinë amerikane. Trump premtoi se me këtë hap do të rihapen tregjet dhe do të krijohen mundësi për rinovimin e industrisë vendase, duke sjellë më shumë vende pune. Ai gjithashtu njoftoi se do të nënshkruajë një urdhër ekzekutiv që do të zbatojë tarifa reciproke ndaj shteteve që përdorin tarifa të larta ndaj produkteve amerikane.
Trump: Deficiti tregtar përfaqëson “një emergjencë kombëtare”
Presidenti Donald Trump ka theksuar se deficiti tregtar i SHBA-së përbën një “emergjencë kombëtare” që kërcënon sigurinë dhe mënyrën e jetesës amerikane. Ai theksoi se kompanitë amerikane nuk janë në gjendje të prodhojnë mjaftueshëm antibiotikë dhe se SHBA importon praktikisht të gjitha kompjuterët, telefonët, televizorët dhe elektronikat. Trump gjithashtu u shpreh se një kantier detar në Kinë prodhon më shumë anije sesa të gjitha kantieret detare të SHBA-së së bashku çdo vit.
Ai njoftoi se, duke filluar nga nesër, SHBA do të zbatojë tarifa reciproke ndaj vendeve të tjera, duke shtuar se ky veprim është i nevojshëm për të mbrojtur interesat e SHBA-së dhe të popullit të saj.
Trump: “Është koha që SHBA të kujdeset për popullin e saj”
Trump theksoi se nuk është shumë vonë për të pasuruar përsëri SHBA-në dhe për të ndaluar humbjen e pasurisë që, sipas tij, është marrë nga vendet e tjera. Ai theksoi se SHBA ka subvencionuar shumë shtete të tjera dhe ka marrë përsipër nevojat e tyre, ndërkohë që ka nevojë të fillojë të kujdeset për popullin e vet.
Trump kritikon taksën mbi të ardhurat për qytetarët amerikanë
Gjithashtu, Trump kritikon taksën mbi të ardhurat e qytetarëve amerikanë, duke kujtuar se në fund të shekullit të 19-të dhe fillim të shekullit të 20-të, SHBA ishte “më e pasura se kurrë”. Ai shpjegoi se në vitin 1913, taksa mbi të ardhurat u vendos për arsye që “nuk janë të njohura për njeriun”, dhe se kjo ishte një mënyrë për të bërë që qytetarët dhe jo shtetet e huaja të financojnë qeverinë amerikane.
