Një pjesëtar i Policisë së Kosovës ka humbur jetën pas një sulmi në hyrje të shtëpisë së tij në rrugën “Idriz Seferi” në Kaçanik. Ngjarja ndodhi më 1 prill, rreth orës 23:00.
Sipas zëdhënësit të policisë për rajonin e Ferizajt, Kanun Veseli, viktima u gjet në gjendje të rëndë dhe u transportua në Qendrën e Mjekësisë në Kaçanik, ku mjekët e konstatuan vdekjen.
“Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra pjesëtari i Policisë ka ndërruar jetë, kjo është konstatuar nga mjekët në këtë qendër”, tha Veseli.
Për të gjitha veprimet policore është njoftuar prokurori i shtetit dhe IPK.
Hetuesit dhe krimteknikët rajonal kanë dalë në vendin e ngjarjes për të kryer ekzaminimet e nevojshme. Nuk dihen akoma shkaqet se si ka ardhur deri te kjo ngjarje.
