Presidenti i Shqipërisë, Bajram Begaj, thotë se me trishtim mori lajmin për shuarjen e Margarita Xhepës, yllit të skenës dhe ekranit shqiptar.
Begaj në një postim në Facebook, thotë se me interpretimet e saj, ku spikati në mishërimin e figurës së gruas dhe veçanërisht të nënës, Margarita Xhepa çoi dritë dhe u bë pjesë e dashur e familjeve shqiptare.
“Artistja e madhe, një figurë publike e respektuar, grua dhe nënë e nderuar, deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve.
Ngushëllimet e mia më të ndjera shkojnë për familjen, që sot iu nda nga jeta njeriu i tyre i shtrenjtë, për komunitetin e artistëve shqiptarë dhe për mbarë shqiptarët që e kanë ndjekur dhe duartrokitur artin që Margarita Xhepa dhuroi ndër vite”, ka shkruar Begaj në Facebook.
Edhe kryeministri i Shqipërisë, Edi Rama ka reaguar pas vdekjes së ikonës shqiptare të filmit dhe teatrit, Margarita Xhepa. Ai ka ndarë fotografi të tashmë të ndjerës në llogaritë e tij zyrtare, duke shkruar: “LAMTUMIRË YLL”.
Margarita Xhepa u lind më 2 prill të vitit 1934, në qytetin e Lushnjës, prej ku nisi edhe hapat e parë drejt karrierës së saj. Gjatë karrierës së saj, aktorja e madhe Margarita Xhepa ka krijuar mbi 150 role në teatër.
