Grupi i qytetarëve “Asnjë cent ma shumë” do të organizojë sot një protestë në sheshin “Skënderbe” në Prishtinë, kundër rritjes së çmimit të energjisë elektrike. Protesta do të nisë nga ora 15:00 dhe është një reagim ndaj ngritjes së çmimeve të energjisë, e cila ka shkaktuar shqetësim të madh tek qytetarët dhe bizneset.
“15% nuk kalon! Monopoli privat nuk kalon!” është motoja e protestuesve, të cilët kërkojnë ndërhyrje për të siguruar energji elektrike të përballueshme për të gjithë qytetarët e Kosovës.
“Ju ftojmë të bashkoheni në protestën e 5 prillit kundër propozimit të ZRRE-së për shtrejtim të rrymës elektrike me 15%. Ne e konsiderojmë këtë protestë si një manifestim të mllefit të klasës punëtore kundër degradimit të mirëqenies së shumicës. Kjo protestë është shprehje e zemërimit kolektiv ndaj pasurimit dhe grumbullimit të kapitalit nga kompania private KEDS. Monopoli privat nuk kalon! 15% nuk kalon!Shihemi në Sheshin “Skënderbeu” në ora 15:00!”, thuhet në thirrjen e grupit protestues.
