Nga 12 persona të nacionalitetit serb, të cilët janë shoqëruar në stacionin e policisë rajonale të Prizrenit, vetëm dy prej tyre janë ndaluar për 48 orë, pasi kanë bërë prezentim të rrejshëm.
Këtë e ka bërë të ditur zyrtari për marrëdhënie me publikun, rreshter Vesel Gashi.
“Ata janë ndaluar për veprëm “Prezantim i rremë si person zyrtar”. Personat e ndaluar janë S. R i vitit të lindjes 1990 dhe L. S i vitit të lindjes 1991”, ka thënë Gashi për RTK-në.
“Të dyshuarit e lartcekur janë prezantuar si pjesëtarë të MUP-it Serb, por nuk e kanë dëshmuar një gjë të tillë me dokumentacion. Dyshohet se ata janë prezantuar rrejshëm si persona zyrtarë. Për të gjitha është konsultuar prokurori i shtetit, i cili ka lëshuar aktvendim për ndalim për 48 orë për të dyshuarit”, ka theksuar Gashi.
Sipas tij, “personat e tjerë pas intervistimit janë lënë të lirë në procedurë të rregullt”.
Operacioni ka nisur që mbrëmë dhe u finalizua rreth mesditës së sotme.
