Presidentja Vjosa Osmani, është takuar me të Ngarkuarën me Punë të Ambasadës amerikane, Anu Prattipati.
Në njoftimin e presidencës thuhet se në takim u diskutuan zhvillimet e fundit në vend, përfshirë situatën e sigurisë në Kosovë dhe në rajon.
Osmani ka folur për tendencat e vazhdueshme të Serbisë për destabilizimin e Kosovës dhe të të gjithë rajonit përmes veprimeve të mirë koordinuara me struktura ilegale dhe banda kriminale serbe dhe për arrestimin e qytetarëve serbë në Gjakovë dhe Prizren.
“Më tej, Presidentja Osmani dënoi me vendosmëri këto veprime desabilizuese dhe të papranueshme, duke theksuar se Kosova nuk do të tolerojë asnjë ndërhyrje që rrezikon paqen, rendin kushtetues dhe sigurinë e të gjithë qytetarëve të saj, pa dallim përkatësie. Ajo falenderoi të gjitha institucionet e sigurisë për punën në mbrojtje të vendit dhe diskutoi me znj. Prattipati rreth bashkëpunimit të vazhdueshëm me SHBA në këtë drejtim”, thuhet pos tjerash në njoftimin e Presidencës.
Presidentja e njoftoi diplomaten amerikane edhe për hapa të tjerë që do të ndërmarrë për ta thelluar aleancën strategjike me SHBA-të.
