Presidentja Vjosa Osmani ka thënë se presidenti i Turqisë, Rexhep Tayip Erdogan është lideri që i ka qëndruar Kosovës pranë gjithmonë, ndërkaq Turqia një partner kyç.
“Presidenti Erdoğan është lider që i qëndroi Kosovës pranë gjithmonë, në çdo sfidë e në çdo sukses. Ai është një zë i fuqishëm i miqësisë dhe vizionit të përbashkët. Një mik i dëshmuar i Kosovës, një zë i fuqishëm për të drejtën tonë, dhe një shtyllë e fortë mbështetjeje në çdo etapë të shtetndërtimit tonë”, ka shkruar Osmani në Facebook, teksa ka publikuar një fotografi me presidentin turk.
Osmani më tej ka thënë se Turqia mbetet partner kyç për paqen, sigurinë dhe zhvillimin rajonal.
“Marrëdhëniet tona janë më shumë se miqësi, janë një partneritet i ndërtuar mbi besim, respekt dhe vizion të përbashkët për të ardhmen”, ka shkruar tutje Osmani.
Ajo ka marrë pjesë sot në edicionin e katërt të Forumit Diplomatik të Antalisë. Forumi i këtij viti, me temën “Rikthimi i diplomacisë në një botë të fragmentuar”, i adresoi sfidat ndërkombëtare në një kontekst të polarizuar global, duke vënë theksin në nevojën që diplomacia ta rifitojë rolin e saj si forcë stabilizuese dhe ndërtuese e paqes.
