26-vjetori i Betejës së Koshares dhe ditës së rënies heroike të Agim Ramadanit është kujtuar në kuadër të “Ditëve të Shqipes 2025” në Bibliotekën Kombëtare të Kosovës, “Pjetër Bogdani”.
Në emër të presidentes Vjosa Osmani, këshilltari ushtarak i saj dhe gjeneral brigade Sefer Isufi tha se të rënët e Koshares nuk e kanë ndaluar kurrë betejën, por e kanë vazhduar me mjete të tjera.
“Agim Ramadani ishte shumë më tepër se një komandant, ai ishte arkitekt i betejave, por edhe poet i lirisë. Ishte mjeshtër i strategjive dhe taktikave ushtarake, por edhe një shpirt krijues që i jepte ngjyrë ëndrrës për çlirim. Ai nuk komandonte vetëm me urdhëra, por me shembull, frymëzim, me dashuri të thellë për çdo ushtar dhe pëllëmbë të këtij atdheu”, ka thënë ai.
Ai tha se liria për Ramadanin nuk ishte qëllim por domosdoshmëri dhe lufta nuk ishte hakmarrje por drejtësi.
Gruaja e komandant Katanës, Shukrije Ramadani, ka thënë se heronjtë na kanë mësuar ndër vite që bashkimi e sjellë lirinë.
“Heronjtë nuk duken si heronj. Ata duken si njerëz të zakonshëm që dinë t’iu dridhet buza nga dashuria e t’iu ligështohet trupi nga shikimi i të dashurës. Heronjtë janë ata që dinë të bëjnë hapa në vendet ku të tjerët s’guxojnë të shkelin, janë ata që dinë të kthehen edhe nëse nuk vijnë, ata që na falën një rreze shprese atëherë kur terri mbyt ëndrrat e agimeve, ata që na e kthyen lumturinë atëherë kur prekëm fundin e shpresës. Heronjtë janë ata që na mësuan se pushkët e bashkuara e kanë krismën më të fortë. Heronjtë janë ata që dinë të dashurojnë lirinë dhe të japin jetën për atë liri. Kështu ishe heroi që njoha unë dhe shumë nga ju”, ka thënë ajo.
