Nga Ymer Hysa Divjakë, 19 prill 2025
Mjediset e qytetit dhe salla e Shtëpisë së Kulturës do të përcillnin hareshëm sot emocionet festive të një dite të veçantë në qytetin e Divjakës. Unioni i Gazetarëve Shqiptarë Dega Fier me mbështetjen e Shoqatës kombëtare Kulturore Ress Egnatja, si dhe të medias online Newsalbania.al, për të tretën herë rradhasi në këtë qytet mes gazetarëve të shumtë, një publiku të gjërë dhe drejtuesve të pushtetit vendor do të ndante Çmimet “Aristidh Kola” (Nderi i Kombit) në gazetari, edicioni i pestë. Ishte pikërisht Divjaka vëndi i origjinës së herëshme i këtij arvanitasi të shquar dhe Rilindasi të fundit që i kushtoi jetën studimeve të origjinës së shqiptarëve. Juria e vlerësimeve të këtij edicionit përbëhej nga Ilir Krasniqi-kryetar (gazetar Prishtinë), Besim Dybeli-antarë (gazetar dhe kryetar UGSH-Qarku Elbasan si dhe Ilirjan Gjika-antarë (historian) të cilët me profesionalizëm mes shumë të propozuarve do të përzgjidhnin personalitete të shquar e me emër të gazetarisë shqiptare si gazetari dhe moderatori e mirënjohur Dëfrim Methasani, gazetari Jonuz Hallaçi, poeti, shkrimtari dhe publicisti Ben Blushi, aktori Bujar Asqeriu, gazetarja e Report Tv Marsela Topi si dhe Anastas Ristan Prifti ( Pas Vdekjes)
Ceremonia e ndarjes së çmimeve u realizua përmes një aktiviteti artistik nën moderimin e gazetares dhe kryeredaktores së SCAN TV Alida Lula, moderimi i së cilës për vlerat që shpalosi kaloi kufinjtë e një spektakli të mirfilltë. Kampionët e gazetarisë shqiptare për këtë vit, të vlerësuar nga Unioni i Gazetarëve Dega Fier, në fjalën e tyre u shprehën jo vetëm të emocionuar, por edhe të vlerësuar dhe nderuar për këtë çmim të lartë që mban emrin e njërit prej studiuesve më të guximshëm që e pagoi me jetën e tij aktivitetin gjurmues përmes hulumtimeve të origjinës shqiptare dhe kryesisht të Arvanitasve. Në aktivitetin e organizuar u diskutua jo vetëm rreth jetës dhe veprës së këtij patrioti të shquar, por gazetarët e pranishëm u njohën edhe me projektin e UGSH dega Fier për ti propozuar Ministrisë së Arsimit përfshirjen në tekstet shkollore të pjesëve nga krijimtaria e studiuesit Aristidh Kola si dhe për emërtimin e një institucioni në Bashkinë Divjakë Veç sa më sipër miqtë gazetarë vizituan edhe mjediset e mrekullueshme të lagunës, ku u njohën me pyllin e virgjër si dhe me florën dhe faunën e kësaj lagune të miradministruar.
