Rrjeti i OJQ-ve “Avonet” shpreh shqetësimin e thellë dhe të vazhdueshëm lidhur me “sjelljen jotransparente dhe të kundërligjshme të Organit Shqyrtues të Prokurimit, e cila, përkundër obligimeve ligjore, ka refuzuar të ofrojë qasje në dokumente publike” që lidhen drejtpërdrejt me ushtrimin e funksioneve të tyre publike.
Sipas njoftimit të “Avonet”, së fundmi, Agjencia për Informim dhe Privatësi ka shqiptuar një gjobë prej 3 mijë eurosh ndaj Organit Shqyrtues të Prokurimit për arsye se kjo e fundit, përmes heshtjes administrative, ka refuzuar të përgjigjet ndaj kërkesës së AVONET për qasje në dokumentet publike, veprim ky sipas Avonet që përbën shkelje të drejtpërdrejtë të Ligjit për Qasje në Dokumente Publike.
“Ky veprim i Agjencisë për Informim dhe Privatësi është një hap i rëndësishëm drejt vendosjes së përgjegjësisë institucionale dhe garantimit të së drejtës së qytetarëve për informim, veçanërisht kur bëhet fjalë për prokurimin publik, shpenzimin e parasë së taksapaguesve dhe ushtrimin e funksioneve publike”, thuhet në komunikatën e Avonet.
AVONET vlerëson se sjellja e përsëritur e OSHP-së duke refuzuar, përmes heshtjes administrative në mënyrë sistematike kërkesat për qasje dhe duke shkelur ligjin është një praktikë e rrezikshme, që jo vetëm e zvogëlon besimin e qytetarëve në institucionet publike, por mund të përbëjë edhe elemente të keqpërdorimit të detyrës zyrtare nga zyrtarët përgjegjës të këtij institucioni shtetëror.
“Ne ritheksojmë thirrjen tonë ndaj institucioneve relevante që të ndërmarrin masa konkrete dhe urgjente për të siguruar transparencë të plotë në të gjitha proceset e menaxhimit të fondeve publike. Po ashtu, AVONET fton OSHP-në që të reflektojë menjëherë, të përmbushë obligimet e saj ligjore dhe të vendosë llogaridhënie të vërtetë për qytetarët e vendit tonë. Ne vlerësojmë se është shumë e rëndësishme që pas konstituimit të Kuvendit të Kosovës, komisioni parlamentar i cili mbikqyrë punën e OSHP-së, të thërras në raportim Bordin e OSHP-së, dhe të kërkojë llogari për këtë qasje të kundërligjshme dhe jashtëzakonisht jo-transparente, që OSHP po e ushtron ndaj qytetarëve të Kosovës”, thuhet në komunikatë.
Në fund thuhet se vetëm përmes transparencës dhe respektimit të ligjit mund të ndërtojmë një shoqëri të drejtë, transparente, të ndershme dhe demokratike.
