Pas disa orë kërkimesh gjendet 8-vjeçari nga Gjilani i cili ishte raportuar i zhdukur të dielën e 27 prillit, është gjetur shëndosh e mirë. Lajmi u bë i ditur nga Shoqata e Kosovës për Kërkim-Shpëtim (SHKKSH).
Shoqata e Kosovës për Kërkim-Shpëtim ka theksuar se peracioni i kërkim-shpëtimit në Gjilan ka përfunduar me sukses.
“Fëmija është gjetur dhe është i sigurt. Falënderojmë të gjithë qytetarët, vullnetarët dhe institucionet që u mobilizuan dhe na përkrahën në këtë mision. Bashkë treguam edhe një herë fuqinë e solidaritetit dhe përkushtimit”, thuhet në njoftim.
Alpi ishte zhdukur nga shtëpia rreth orës 15:30 të dielën, dhe duke pasur parasysh që ai vuan nga autizmi, shqetësimi ishte më i madh.
Pas thirrjes për ndihmë, autoritetet lokale, përfshirë policinë dhe grupet vullnetarë të kërkimit-shpëtimit, nisën menjëherë kërkime intensive në terren, duke përdorur edhe dronë për të pasur një pamje më të gjerë të zonës dhe për të rritur shanset për ta gjetur.
Gjatë kërkimeve pa hezitim ishin angazhuar edhe shumë qytetarë të zonës.
Lajmin e ka konfirmuar edhe familja e tij. “Voglushi është gjetur shëndosh e mirë! Ju faleminderit nga zemra, Zoti ju rujt!”, thuhet në njoftimin e familjes.
Kryetari i Gjilanit, Alban Hyseni, ka reaguar pasi është gjetur Alpi, një fëmijë që humbi në Gjilan.
“Të dashur qytetarëJu njoftojmë se Alpi është gjetur shëndosh e mirë! Pas një angazhimi të jashtëzakonshëm dhe bashkëpunimi të madh nga qytetarët, institucionet dhe vullnetarët, Alpi tashmë është pranë familjes së tij. Ju falënderojmë nga zemra secilin prej jush për ndihmën, mobilizimin, përkushtimin dhe solidaritetin që treguat në këto momente të vështira”, ka shkruar Hyseni në Facebook.
