Në një intervistë për Radion Evropa e Lirë, Kos foli për situatën në BiH, pasi u pyet nëse e sheh Milorad Dodik si dikë me të cilin mund të flasë për procesin e anëtarësimit në BE.
“Është e vështirë të merresh me dikë që nuk punon në interesin më të mirë të vendit të tij, BiH-së. Dhe është e vështirë të merresh me dikë që shkon kundër integritetit territorial, sovranitetit dhe rendit kushtetues. Dhe kjo është një nga arsyet pse ende nuk kemi qenë në gjendje të hapim negociatat me BiH-në, edhe pse BiH ka statusin e kandidatit, por për shkak të situatës së brendshme politike, ata as nuk mund ta emërojnë kryenegociatorin”, tha Kos.
Ajo shton se qeveria në Bosnjë dhe Hercegovinë “nuk është në gjendje të vendosë në letër një axhendë reformash që do t’i mundësonte asaj të merrte një miliard euro nga Plani i Rritjes së BE-së”.
“Pra, ne po punojmë vërtet për këtë tani,” tha ajo.
Megjithatë, Kos sheh shpresë kur bëhet fjalë për procesin e negociatave për shkak të bashkëpunimit të opozitës.
“Dhe për momentin ka disa pika pozitive, përkatësisht se ekziston një opozitë në RS që po bëhet më konstruktive, dhe kjo mund të jetë një përparim për procesin e negociatave.
Duke folur për sanksionet për Dodikun në lidhje me sjelljen e tij shkatërruese, Kos tha se kjo nuk është e realizueshme sepse jo të gjitha shtetet anëtare të BE-së bien dakord për këtë.
“Shtetet anëtare nuk janë të bashkuara për çështjen e sankioneve kundër Dodikut”, tha ajo shkurt.
