Shkruan: Florim ZEQA
Serbët kur janë në pyetje interesat e tyre nacionale bëhen bashkë si një trupë e vetme, kurse neve shqiptarëve na bën bashkë vetëm interesi partiakë! Serbët i bashkon interesi ndaj Kosovës, kurse neve shqiptarëve nuk na bën përshtypje interesi i shtetit të fituar me gjak dhe sakrifica të panumërta para interesit personal dhe partiakë. Qysh nuk po u vjen marre prej serbëve politikanë të mjerë!
E keni tepruar deputet servil të liderëve partiakë
E gjitha çfarë po ndodhë në mbledhjet e Seancës Konstituive të Kuvendit të Kosovës, më tepër është strategji e partive parlamentare për të dëshmuar forcën ndaj njëra-tjetrës sesa vullnet për të ecur përpara në krijimin e institucioneve të reja shtetërore.
Përplasjet mes VV-së dhe partive të tjera po dëmtojnë funksionimin e Kuvendit, duke krijuar kështu një bllokadë të qëllimshme, e cila po e bën të pamundur formimin e institucioneve të reja shtetërore.
Edhe përkundër kërkesës së partive rivale që të ndryshojë kandidatin, LVV-ja përsëri e propozojë Albulena Haxhiun për Kryetare të Kuvendit të Kosovës, duke e legjitimuar kështu dështimin e gjashtë të saj në Kuvend!
Janë të pakuptimta akuzat e ndërsjella të partive parlamentare. VV-ja po akuzon partitë e tjera për bllokadë të qëllimshme të Kuvendit, ku ngjashëm po deklarohen edhe PDK-ja, LDK-ja dhe AAK-ja për partinë e parë.
Opozitës i takon që ta bëjë hapin e parë në konstituivin e Kuvendit, pastaj le t’i matin forcat me partinë fituese të zgjedhjeve, por assesi nuk i takon të bllokojë në mënyrë të pandershme zgjedhjen e Kryeparlamentarit dhe pesë nënkryetarëve të Kuvendit.
Fundja, ky është obligim kushtetues i deputetëve të Kuvendit që të zgjedhin organet drejtuese të institucionit legjislativ nga i cili po i marrin në mënyrë të padinjitetshme mëditjet nga buxheti i shtetit!
Në situatën e krijuar kanë mbetur vetëm dy rrugë: zhbllokim ose shkuarje në zgjedhje të jashtëzakonshme! Shpërbërja eventuale e një Kuvendi të pakonstituuar do të ishte rast i keq dhe i paprecedent, do të ishte alarm për proceset e ardhshme demokratike para të cilave ndodhet vendi ynë!
Dështim pas dështimi kemi arritur në përpjekjen e 9-të të 1 Majit për konstituivin e Legjislaturës së 9-të! Nëse edhe në seancën e ditës festive dështojnë deputetët në konstituivin e organeve drejtuese, Kuvendit duhet t’i vihet dryni që të mbrohet nga abuzimi i mëtutjeshëm i politikanëve të papërgjegjshëm!
