Një gjykatë në Tajlandë ka dënuar një miliarder atje me 24 vjet burg për zgjerimin e resortit të tij luksoz të golfit në dëm të një rezervati natyror, raportuan mediat lokale.
Manjati metalurgjik Prayudh Mahagitsiri u akuzua në vitin 2021 për dhënie ryshfeti zyrtarëve për të marrë tapi pronësie për zgjerimin e resortit të tij të golfit dhe rezidencës në Mountain Creek.
Ky vendpushim përfshin një fushë golfi me 27 vrima të shtrirë në një sipërfaqe prej 360 hektarësh në provincën Nakhon Ratchasima, në verilindje të Bangkokut.
U shtuan 30 hektarë që ishin në një zonë të mbrojtur
Gjykata arriti në përfundimin se transaksioni ishte i paligjshëm sepse 30 hektarët e shtuar në projekt ishin në zona të mbrojtura. Gjykata Qendrore Penale për Korrupsion dhe Përvetësim e shpalli 79-vjeçarin Prayudh fajtor për disa akuza, përfshirë ryshfet dhe shkelje të pronës.
Vlerë 2.6 miliardë dollarë
Sipërmarrësi i çelikut dhe kafesë, pasuria e të cilit vlerësohet në 2.6 miliardë dollarë sipas Forbes, planifikon të apelojë. Sipas Forbes, në vitin 2024 ai ishte personi i dhjetë më i pasur në Tajlandë.
Golfi është një nga atraksionet kryesore turistike të Tajlandës, por ekologët shpesh e kritikojnë këtë sport sepse i shndërron hapësirat e gjera të natyrës në zona të gjelbra që kërkojnë ujitje intensive.
