Presidenti i Federatës së Futbollit të Kosovës, Agim Ademi, ka kujtuar me krenari përvjetorin e nëntë të anëtarësimit të Kosovës në UEFA, duke e vlerësuar këtë ditë si një ndër më të rëndësishmet në historinë e sportit dhe të shtetit të Kosovës.
Në një mesazh përkujtues të publikuar në faqen zyrtare të FFK-së, Ademi ka theksuar se kjo datë është e gdhendur në historinë kombëtare, pasi më 3 maj 2016, në Kongresin e 40-të të UEFA-s të mbajtur në Budapest, Kosova u pranua si anëtarja më e re e shtëpisë evropiane të futbollit. Ai e përshkroi këtë si një moment historik për të gjithë popullin e Kosovës, që erdhi pas një rruge të gjatë përplot sfida e sakrifica.
“Që nga ajo ditë e artë, futbolli ynë ka kaluar nëpër një proces të thellë transformimi”, ka shkruar Ademi, duke veçuar sukseset e klubeve kosovare në garat ndërkombëtare dhe avancimin e Kombëtares në Ligën B të Ligës së Kombeve, si dhe ngritjen në vendin e 97-të në renditjen e FIFA-s – pozita më e lartë ndonjëherë për Kosovën.
Në mesazhin e tij, presidenti i FFK-së ka nënvizuar edhe përparimin në edukimin e trajnerëve, ku tashmë FFK është e licencuar për të ndarë Licencat UEFA A, ndërsa pritet të fillojë procedurat edhe për Licencën UEFA Pro. Ai gjithashtu theksoi përmirësimin e dukshëm të infrastrukturës, veçanërisht Shtëpinë e Futbollit dhe Kampin Nacional në Hajvali, e që sipas tij, janë vlerësuar lart edhe nga vetë UEFA.
“Standardet janë ngritur, infrastruktura është përmirësuar dhe futbolli është shndërruar në një aset kombëtar që frymëzon një popull të tërë”, ka theksuar Ademi, duke përmendur projektet e përbashkëta me komunat për ndërtimin e fushave stërvitore çdo 45 ditë.
Ai nuk ka harruar të shprehë mirënjohje për të gjithë ata që kontribuuan në këtë rrugëtim historik, duke përmendur emra si Agim Bytyqi, Rexhep Abdullahu, Sabri Hashani dhe të gjithë ata që ruajtën shpirtin e futbollit në kohët më të vështira. Një vend të veçantë në këtë rrëfim zë edhe legjenda Fadil Vokrri, të cilin Ademi e ka cilësuar si liderin e misionit historik për anëtarësimin në UEFA, duke përkujtuar simbolikisht edhe numrin 9 që Vokrri e mbante në fanellën e tij.
Në fund të mesazhit, Ademi ka ritheksuar përkushtimin e tij dhe të Komitetit Ekzekutiv për të çuar përpara çdo projekt dhe iniciativë për zhvillimin e mëtejmë të futbollit në vend.
