Ndërmarrja “Prishtina Parking” tanimë nuk ka të drejtë të vendosë bllokada në gomat e veturave të parkuara në rast të mospagesës së tarifës, e as të bartë apo zhbllokojë vetura. Kjo pas miratimit të padisë që Grupi për Studime Juridike dhe Politike ka dorëzuar në Gjykatën Supreme, e cila ka vendosur në favor të kësaj padie. Sipas të dhënave, “Prishtina Parking” ka lëshuar deri në 6 mijë tiketa në ditë për shfrytëzuesit e parkingjeve dhe ka vendosur rreth 190 bllokada në ditë.
Nga 5 maji, ndërmarrja publike lokale “Prishtina Parking” nuk ka asnjë kompetencë që të vendosë bllokada në vetura, obligohet të marrë përgjegjësi për dëmet që shkaktohen nga punonjësit e saj, nuk ka të drejtë të bllokojë, zhbllokojë apo bartë vetura për shkak të mospagesës së tarifës dhe nuk mund t’ua mohojë qytetarëve qasjen në shërbime publike, duke ua imponuar formën e pagesës vetëm përmes telefonit.
Kjo sipas një vendimi të Gjykatës Supreme, e cila ka miratuar padinë e Grupit për Studime Juridike dhe Politike, duke shfuqizuar 9 dispozita të rregullores së ndërmarrjes “Prishtina Parking”.
“Nga të dhënat zyrtare që ka Prishtina Parking thuhet që diku gjatë ditës i lëshon diku deri në 6000 tiketa për shfrytëzuesit e parkingjeve në komunën e Prishtinës, ndërsa janë rreth 190 bllokada që i vendosin çdo ditë në veturat e qytetarëve të cilët qoftë për vonesa të arsyeshme apo paarsyeshme vonojnë për me e bo pagesën në Prishtina Parking, ndonjëherë ndoshta edhe për problem të sistemit të tyre”, tha Liridon Salihi, qendra për raste gjyqësore strategjike.
“Ky vendim i gjykatës supreme është një fitore e madhe për misionin e qendrës për mbrojtjen e interesit publik nga aktet nënligjore të kundërligjshme të autoriteteve publike dhe gjetjet e gjykatës sipas padisë sonë do të shërbejnë si precedent për të gjitha komunat e Republikës së Kosovës për shfrytëzimin e parkingjeve publike”, tha Ema Pula, Qendra për Studime Juridike dhe Politike.
Nga kjo organizatë njoftuan se do të monitorojnë respektimin e vendimit të Supremes nga komuna e Prishtinës dhe nga ndërmarrja Prishtina Parking, duke paralajmëruar padi të reja në rast të shkeljes së vendimit.
RTK kërkoi nga “Prishtina Parking” një përgjigje në lidhje me vendimin e Supremes për shfuqizimin e pjesshëm të rregullores së ndërmarrjes dhe zyrtarët e saj thanë se do ta zbatojnë vendimin e gjykatës.
