Një ngjarje e rëndë është raportuar sot orës 18:20 në Prizren, ku një 24-vjeçar ka humbur jetën në rrethana të dyshimta.
Lajmin për RTKlive e ka konfirmua, zëdhënësi i Policisë për rajonin e Prizrenit, Shaqir Bytyqi.
Sipas njoftimit nga Policia e Kosovës, dy persona të moshës 23 dhe 24 vjeç kanë njoftuar Stacionin Policor Prizren-Veri se, gjatë një takimi me viktimën A.T., i kanë dorëzuar atij një armë zjarri (pistoletë) me qëllim shitjeje. Sapo ka marrë armën, viktima dyshohet se ka shtënë në drejtim të vetes.
Njësitet policore janë nisur menjëherë drejt vendit të ngjarjes, ndërsa janë njoftuar edhe emergjenca dhe njësitë përkatëse hetimore. Mjeku në vendngjarje ka konstatuar vdekjen e viktimës.
Bëhet e ditur se me urdhër të prokurorit të rastit, trupi i pajetë është dërguar për ekzaminim në Institutin e Mjekësisë Ligjore.
Ndërkohë, hetimet janë duke vazhduar për të sqaruar plotësisht rrethanat e ngjarjes, përfshirë edhe aspektin penal të posedimit të paautorizuar të armës së zjarrit.
