Aleanca për Ardhmërinë e Kosovës ka dorëzuar në Gjykatën Kushtetuese lëndën për vlerësimin e kushtetutshmërisë së vendimeve të Kuvendit të Kosovës për konstituimin e legjislaturës së nëntë, përkatësisht votimin e fshehtë për kryetar të Kuvendit.
Deputetja Time Kadrijaj e ka dorëzuar lëndën, e ku sipas AAK-së lënda përfshin të gjitha veprimet që lidhen me seancën konstituive të Kuvendit dhe vazhdimet e saj, të përmbledhura në dokumentin zyrtar “Transkript i Mbledhjes Konstituive të Kuvendit të Republikës së Kosovës”, që përfshin mbledhjet e mbajtura më 15, 17, 19, 21, 23, 25, 27, 29 prill, si dhe më 1, 3 dhe 5 maj 2025.
“Sot si AAK, me nënshkrimet e deputetëve tanë, të LDK-së por edhe të PDK-së, e kemi dërguar në Gjykatë Kushtetuese për interpretim të votimit në mes të procedurave për zgjedhjen e kryeparlamentarit. Raporti është hartuar nga ekspertë të AAK-së dhe ne kërkuam nga Gjykata Kushtetuese që kjo të trajtohet me prioritet. Duke konsideruar se është shkelje ligjore, po mendojmë se po zhvlerësohet edhe vlera e kuvendit të Kosovës, duke mbajtur seanca çdo 48 orë, e në të cilat konsiderojmë se po shkelet Kushtetuta e Republikës së Kosovës. I lutëm akterët që ta trajtojnë me prioritet, ndoshta edhe me një masë për pezullim të përkohshëm të seancave, derisa gjykata ta trajtojë me prioritet këtë lëndë dhe ta marrë një vendim”, tha Kadrijaj.
Ajo ka thënë se ajo që po ndodh në Kuvendin e Kosovës është e patolerueshme.
“Ne nuk e kontestojmë që partia e parë, me një vendim të Gjykatës Kushtetuese, e ka të drejtën e propozimit të kryeparlamentarit por nuk është e drejtë e tyre që të kërkojnë prej nesh që ta votojmë kryeparlamentarin. Partia që e ka shumicën duhet të sigurojë votat për zgjedhjen e kryeparlamentarit dhe më pas për zgjedhjen e qeverisë. Prandaj, kjo formë e ndryshimit prej votimit të hapur në votim të fshehtë, ne konsiderojmë se është shkelje kushtetuese dhe kjo është arsyeja që iu kemi drejtuar Gjykatës Kushtetuese”, shtoi ajo.
Nëse gjykata vendos të kundërtën e asaj që është kërkuar nga AAK, Kadrijaj ka thënë se ata gjithmonë i kanë respektuar vendimet e këtij institucioni dhe cilido që të jetë vendimi edhe kësaj here do ta respektojnë.
Ndërkohë, kryetari i Aleancës për Ardhmërinë e Kosovës, Ramush Haradinaj përmes një postimi në Facebook ka theksuar se moskonstituimi i Kuvendit “është kthyer në një lojë të turpshme, që po dëmton jo vetëm deputetët e zgjedhur nga populli, por vetë shtetin e Kosovës”.
“Skenari i seancave që përsëriten çdo 48 orë, pa asnjë vendim, është bërë model i papjekurisë sonë shtetërore”, ka shkruar Haradinaj, duke shtuar se bllokada aktuale po prodhon pasoja të rënda politike dhe ekonomike për vendin.
Legjislatura e nëntë e Kuvendit të Kosovës, të dielën, dështoi të konstituohej edhe në përpjekjen e 14-të.
