Organizatorët e Sunny Hill Festival kanë konfirmuar rikthimin e shumëpritur të Dua Lipës në Prishtinë këtë verë. Ylli global i muzikës pop do të performojë në edicionin e vitit 2025 të festivalit, që do të mbahet nga 1 deri më 3 gusht.
“E konfirmuar: Dua Lipa rikthehet në Sunny Hill Festival 2025”, thuhet në njoftimin e organizatorëve, duke shtuar se Prishtina do të jetë destinacioni i vetëm në Evropën Juglindore ku këngëtarja me famë botërore do të ndalojë si pjesë e turneut të saj botëror “Radical Optimism”.
Pas performancave madhështore në skenat më prestigjioze të botës si Glastonbury dhe Royal Albert Hall, si dhe pas sukseseve në qytete si Melbourne, Madrid dhe shumë të tjera, Dua Lipa do të sjellë hitet dhe energjinë e saj unike në kryeqytetin e Kosovës.
Përveç Dua Lipës, festivali ka konfirmuar edhe PEGGY GOU, e cila është renditur si DJ Nr. 1 në Top 100 DJ të DJ Mag për vitin 2023. Gou është e njohur për hitin veror “(It Goes Like) Nanana” dhe do të performojë në skenën C4, ku pritet të elektrizojë publikun.
Organizatorët kanë bërë të ditur se shumë emra të tjerë ndërkombëtarë dhe lokalë do të zbulohen së shpejti.
