Drejtori i Institutit “Octopus”, Arben Fetoshi ka reaguar ndaj fushatës së fundit shpifëse, siç e quan ai, të Serbisë për gjoja “ngacmimet seksuale të vajzave dhe grave serbe” në veri.
Sipas tij, kjo narrativë mashtruese, e cila s’është diçka e re në aktivitetet hibride kundër Kosovës, ka për qëllim demonizimin e Policisë së Kosovës, si një ndër institucionet më të besueshme të vendit dhe parapërgatitjen e terrenit për sulme të reja, duke u maskuar me shpifje që nxisin reagim emocional të qytetarëve.
“Lufta hibride e Serbisë kundër shtetit të Kosovës, me sulmet e armatosura në veri, si inkursioni në Banjskë dhe sulmi terrorist në kanalin e Ibër-Lepencit, apo ‘zbulimi’ qesharak i BIA-s se pas këtij sulmi ishte Policia e Kosovës, ditët e fundit ka inskenuar edhe një fushatë shpifëse që ka për qëllim rrënimin e imazhit të policisë, si parapërgatitje e terrenit për sulme të reja dhe si parakusht për politikën e saj ekspansioniste në Kosovë. Për t’i bërë më “bindëse” këto shpifje, ajo ka inskenuar po ashtu një reagim të disa organizatave joqeveritare në emër të ‘shoqërisë civile’, duke sfiduar EULEX-in dhe institucionet e tjera ndërkombëtare (Komunikatë për medie, 12.05.2025, https://ngoaktiv.org/alb/te_reja/komunikate-per-medie/). Mirëpo, kjo narrativë mashtruese nuk është asgjë e re në sulmet hibride të Serbisë sipas modelit rus, pasi shpifjet janë përdorur edhe gjatë krizave të mëparshme si në vitin 2011, 2015 apo 2023”, ka shkruar Fetoshi.
Megjithatë, sipas tij, “nëse demaskimi përmes të vërtetës nga institucionet e Kosovës mund të ’merret’ si i njëanshëm, atëherë EULEX-i dhe organizatat ndërkombëtare për të drejtat e njeriut duhet të veprojnë me urgjencë, ta hulumtojnë të vërtetën dhe ta denoncojnë ashpërsisht luftën perfide të Serbisë kundër Kosovës”.
