Deputeti i Lëvizjes Vetëvendosje, Hekuran Murati ka thënë se do ta shqyrtojnë ftesën e presidentes Vjosa Osmani për takim konsultativ.
Murati duke hyrë në objektin e Kuvendit të Kosovës në vazhdimin e seancës së pesëmbëdhjetë të konstituimin e legjislaturës së nëntë, ka theksuar se për ftesën do të vendosë Grupi Parlamentar i LVV-së, i cili përbëhet edhe nga partnerët Guxo dhe Alternativa.
“Duhet me pa se çka ka vendosur Grupi Parlamentar. Gjithsesi që shqyrtohet ftesa dhe shihet se çka është dhe besoj tani ju njoftojmë”, ka theksuar ai.
Faton Peci, deputet i Lëvizjes Vetëvendosje, ka thënë se partia e tij Guxo duhet të marrë ftesë nga presidentja Vjosa Osmani për konsultimet për dalje nga ngërçi politik.
“Ne nuk kemi marrë ftesë, do të duhej sepse jemi subjekt politik i regjistruar në KQZ pavarësisht se s’kemi garuar të vetëm por bashkë me VV-në”, ka thënë bashkëudhëheqësi i Partisë Guxo, Faton Peci.
Presidentja Osmani ka ftuar liderët politikë për një takim të enjten, në tentim për të zgjidhur ngërçin në Kuvend pas zgjedhjeve të 9 shkurtit.
Deri tani takimin e kanë konfirmuar Partia Demokratike e Kosovës, Lidhja Demokratike e Kosovës dhe Aleanca për Ardhmërinë e Kosovës.
