Ministrja në detyrë e Drejtësisë, Albulena Haxhiu, e ka cilësuar si një hap të rëndësishëm në forcimin e sundimit të ligjit dhe ndërtimin e besimit në drejtësi ekstradimin e shtetasit kosovar Liridon Masurica (33-vjeç) drejt Shteteve të Bashkuara të Amerikës.
Masurica, i njohur me nofkën “blackdb”, dyshohet për krime të rënda kibernetike, përfshirë mashtrime dhe vjedhje të identiteteve në internet. Autoritetet amerikane kanë konfirmuar të martën se ai është ekstraduar nga Kosova dhe do të përballet me drejtësinë në SHBA.
Përmes një postimi në Facebook, Haxhiu tha se ky rast është dëshmi konkrete e angazhimit të institucioneve për sundim të ligjit pa dallim.
“Ekstradimi i një personi të shumëkërkuar për krime kibernetike, është dëshmi konkrete e zotimit të palëkundur për sundimin e ligjit pa përjashtim dhe pa kompromis. Ky veprim është një hap i madh përpara në ndërtimin e besimit në drejtësi dhe forcimit të bashkëpunimit ndërkombëtar me Shtetet e Bashkuara të Amerikës. Ky është vetëm një rezultat nga hapat që po ndërmarrim për të dëshmuar se Kosova është një vend ku krimi nuk gjen strehim”, ka shkruar Haxhiu.
Zyra e Prokurorit të SHBA-së në Distriktin e Mesëm të Floridës ka njoftuar se nëse faktohen akuzat ndaj Masuricës, i pandehuri mund të dënohet me burgim maksimal deri në 55 vjet burgim.
Ai tashmë e ka bërë paraqitjen e parë para autoriteteve amerikane dhe iu ka shqiptuar masa e ndalimit dhe gjyqin do ta presë në burg.
Hetimi ndaj të dyshuarit u drejtua nga FBI-ja në bashkëpunim me Drejtorinë e Hetimit të Krimit Kibernetik të Policisë së Kosovës.
