Kompania Rajonale e Mbeturinave PASTRIMI SH.A. ka njoftuar ndërprerjen e shërbimit të grumbullimit të mbeturinave në territorin e Komunës së Prishtinës, për shkak të krizës financiare.
Sipas njoftimit zyrtar të kompanisë, mosshlyerja e borxhit në vlerë prej 2.7 milionë euro nga Komuna e Prishtinës ka detyruar ndërmarrjen që të pezullojë përkohësisht ofrimin e shërbimeve të saj.
“Për shkak të mospagesës së borxhit nga Komuna e Prishtinës në vlerë prej 2.7 milionë euro, jemi të detyruar të ndërpresim ofrimin e shërbimit të grumbullimit të mbeturinave,” thuhet në njoftimin e tyre.
Si pasojë e kësaj ndërprerjeje, gjendja e mbeturinave në kryeqytet është përkeqësuar ndjeshëm, me kontejnerë të tejmbushur dhe grumbullim të madh të mbeturinave nëpër lagje.
