Deputetëve të Kuvendit të Kosovës sot u është dorëzuar një shkresë e Gjykatës Kushtetuese. Përmes kësaj letre ata janë njoftuar se mund t’i dërgojnë komentet lidhur me kërkesën për vlerësim të kushtetutshmërisë së vendimit për mosvotimin e formimit të Komisionit për votim të fshehtë për zgjedhjen e kryetarit të Kuvendit, të dërguar nga AAK-ja.
Letrat u janë shpërndarë deputetëve në sallën plenare nga Sekretaria e Kuvendit, para tentimit të 16-të për konstitutim të Kuvendit.
“Bashkëngjitur me këtë shkresë, ju dërgoj njoftimin e Gjykatës Kushtetuese të Republikës së Kosovës për regjistrimin e kërkesës KO124/25, të parashtruar nga deputetja Time Kadrijaj dhe dhjetë (10) deputetë të tjerë të Kuvendit të Republikës së Kosovës, lidhur me vlerësimin e kushtetutshmërisë së ‘Vendimit të datës 5 maj 2025 për mosvotimin e formimit të Komisionit për Votim të Fshehtë për zgjedhjen e Kryetarit të Kuvendit të Republikës së Kosovës’. Deputetët e Kuvendit mund t’i parashtrojnë komentet e tyre me shkrim, nëse kanë lidhur me kërkesën e lartcekur, jo më vonë se më 19 maj 2025”, thuhet në këtë shkresë.
