Shkruan: Ismail MUÇIQI
Derisa pothuajse në të gjitha trojet Shqiptare politika ka rënë për tokë për shkak të përçarjeve dhe luftës për pushtet, Presidentja e Kosovës, Vjosa Osmani, po tregon lidership të vërtetë duke e përfaqësuar me dinjitet Republikën e Kosovës në arenën ndërkombëtare diplomatike. Mund të thuhet lirisht se ajo është figura më e ndritshme dhe më e pranueshme, e cila po përfaqëson jo vetëm popullin e Kosovës në mekanizmat ndërkombëtarë, por edhe një personalitet politik, intelektual e diplomatik që, përmes autoritetit të saj, po merr mirënjohje dhe dekorata nga institucione dhe shtete të ndryshme demokratike. Vjosa Osmani është një ndër kuadrot më të përgatitura në të gjitha aspektet e lidershipit, dhe autoriteti i saj është në vazhdimësi në ngritje e sipër. Mjerisht, ne Shqiptarët, gjatë historisë, rrallëherë kemi ditur apo dashur t’i çmojmë, vlerësojmë dhe respektojmë figurat politike, intelektuale e kombëtare, derisa janë gjallë. Polarizimi i skenës politike në Kosovë, për interesa të ngushta partiake, ku zgjedhja e presidentit apo presidentes së ardhshme shihet si rezultat i pazareve politike, është mendim i ulët dhe i dëmshëm për shtetin. Po të kishte fare moral dhe dinjitet në politikën Kosovare, Vjosa Osmani do të ishte figura më e pakontestueshme dhe më e përgatitur për t’u rizgjedhur Presidente e Republikës së Kosovës. Mendoj se, që nga shpallja e pavarësisë, në Kosovë kanë mbetur të pareformuara dy çështje themelore të funksionimit të shtetit. Koha ka treguar se Republika e Kosovës ka nevojë urgjente për një ligj të ri, i cili do të mundësonte që Presidenti apo Presidentja të zgjidhet drejtpërdrejt nga populli, e jo përmes pazareve dhe kompromiseve të partive politike. Kjo do të ishte mënyra më demokratike dhe më normale për një shtet modern. Gjithashtu, duhet theksuar se proceset politike dhe funksionimi i institucioneve të shtetit kanë nxjerrë në pah edhe pengesa që burojnë nga vetë Kushtetuta e Republikës së Kosovës, e cila ka nevojë për ndryshime dhe harmonizim me kërkesat e kohës. Vetë fakti i bllokimit të zgjedhjes së Kryetarit të Parlamentit tregon se disa nene të Kushtetutës po shkaktojnë paqartësi dhe konfuzion në procesin e konstituivit të institucioneve shtetërore. Në fund, nëse partitë politike në Kosovë vazhdojnë me obstruksione, hile dhe bllokada për interesa të ngushta, është më se e nevojshme që të formohet një lëvizje politike qytetare, e cila në mënyrë të pavarur, përmes nënshkrimeve të qytetarëve, të kandidojë sërish Vjosa Osmanin për Presidente të Republikës së Kosovës. Jam i bindur se qytetarët ndajnë të njëjtin mendim për figurën e zonjës Vjosa Osmani — një personalitet me të cilin mund të krenohet jo vetëm populli i Kosovës, por të gjithë Shqiptarët, kudo që jetojnë.
