Organizata e Veteranëve të Luftës së Ushtrisë Çlirimtare të Kosovës përmes një letre i ka kërkuar Richard Grenell, përfaqësues për misione speciale të presidentit amerikan Donald Trump, që ta shtrijë ndikimin e tij për mbylljen e Gjykatës Speciale në Hagë ndaj ish-krerëve dhe ushtarëve të tjerë të UÇK-së të akuzuar për krime lufte dhe krime ndaj njerëzimit.
Sipas OVL-UÇK kjo gjykatë “duhet të mbyllet sepse është një turp për drejtësinë amerikane dhe për vlerat amerikane”.
“I nderuar Ambasador, po ju drejtohemi jo si politikanë, por si veteranë drejtuar një veterani tjetër. Vëllezër të armës. Mbrojtës të lirisë. Po ju kërkojmë të ngrini këtë çështje në administratën tuaj. Tatimpaguesit amerikanë nuk i kanë dërguar paratë e tyre të fituara me djersë në Evropë për të financuar një gjykatë që shkel vlerat mbi të cilat është ndërtuar Amerika. Presidenti Trump po rishkruan rregullat e vjetruara të kontrollit politik ndaj drejtësisë së pavarur dhe sipas këtyre rregullave të reja, kjo gjykatë duhet të mbyllet. Ajo është një turp për drejtësinë amerikane dhe për vlerat amerikane”, thuhet në letrën e veteranëve të UÇK-së.
“Përballë drejtësisë kemi dalë edhe më herët (në Gjykatën e Hagës për ish-Jugosllavinë), dhe nuk kemi ikur. Liderët tanë atëherë dhanë dorëheqje vullnetarisht për të dëshmuar pastërtinë e luftës sonë, sepse kur drejtësia është e drejtë, e vërteta fiton. E Dhomat e Specializuara? Kjo nuk është drejtësi. Kjo është një gjueti shtrigash. Presidenti Trump e di më mirë se kushdo tjetër se kur drejtësia rrëmbehet nga elitat politike, ajo kthehet në një armë për të heshtur patriotët. Pikërisht kjo gjykatë është bërë një mjet për të heshtur ata që sollën paqen, ndalën gjenocidin, dhe mbrojtën lirinë”, thuhet në letër.
Tutje OVL-UÇK thotë se sjellja abuzuese e kësaj gjykate “nuk mund të tolerohet”.
“Amerika ishte me ne kur na duhej më së shumti. Dhe tani po ju kërkojmë sërish, ju lutemi, mos lejoni që kjo gjykatë të shkruajë një histori të rreme. Mos lejoni që elitat e korruptuara të shndërrojnë veteranët në horra. Kjo nuk është thjesht një thirrje për ndihmë por është një thirrje për të mbrojtur lirinë, sërish”, thuhet tutje në letër.
