Deputetja e Lidhjes Demokratike të Kosovës, Hykmete N. Bajrami, ka reaguar ndaj veprimeve të kompanisë KESCO, duke e akuzuar për shkelje të Ligjit për Energjinë Elektrike. Sipas saj, KESCO po përjashton ndërmarrjet nga shërbimi universal në kundërshtim me nenin 37, paragrafi II të ligjit në fjalë.
“KESCO është duke përjashtuar ndërmarrjet nga shërbimi universal – furnizim ky me energji elektrike me çmime të rregulluara nga ZRRE, në kundërshtim me Ligjin për Energjinë Elektrike, Nenin 37, paragrafi II,” ka deklaruar Bajrami.
Ajo sqaron se ligji parasheh që për të qenë përfitues i shërbimit universal, duhet të përmbushet njëri nga dy kriteret: ose qarkullimi nën 10 milionë euro ose të kesh më pak se 50 punëtorë. Sipas saj, KESCO po aplikon në mënyrë të padrejtë të dy kriteret si kusht për përjashtim nga shërbimi.
“Nëse Ligji e kërkon OSE njërin ose tjetrin kriter për të përfituar nga shërbimi universal, si ka mundësi që për përjashtim nga shërbimi universal përdoret EDHE njëri EDHE tjetri kriter,” ka pyetur Bajrami.
Ajo thotë se nuk e di nëse ky veprim është rezultat i instruksioneve nga ZRRE, i padijes apo i qëllimshëm, por ajo paralajmëron pasoja ligjore.
“Nuk dihet nëse KESCO është duke e bërë këtë me instruksione të ZRRE-së, nga padijenia ose me qëllim, por një gjë dihet që si rezultat i këtij veprimi KESCO do të përballet me qindra padi pas datës 1 qershor,” ka paralajmëruar ajo.
Duke u mbështetur në të dhënat e shoqatave ekonomike, Bajrami thekson se vetëm një numër i vogël kompanish përmbushin kushtet ligjore për të dalë në të ashtuquajturin “treg të hapur”.
“Sipas të dhënave të shoqatave ekonomike në vend, kriteret sipas Nenit 37 për të dalë në të ashtuquajturin ‘treg të hapur’ i plotësojnë vetëm 300 kompani, jo 1300 që po i përjashton ZRRE-ja,” ka theksuar Bajrami.
Ajo përmbyll reagimin e saj me një vërejtje ligjore të qartë: “Dallimi në mes të ‘OSE’ dhe ‘EDHE’ është dallim i madh në Ligj.”
