Në Prishtinë është hapur panairi me produkte të punuara nga të mbijetuarat e dhunës seksuale të luftës në Kosovë. Në hapjen e panairit u theksua se vetëm të bashkuara gratë mund të arrijnë të ecin para dhe të përballojnë sfidat, duke përmendur sakrificën e tyre gjatë luftës.
Çdo produkt i ekspozuar ka një histori të veçantë. Ato janë punuar me dashuri dhe përkushtim nga të mbijetuarat e dhunës seksuale të luftës. Panairi është organizuar nga Medica Gjakova, në kuadër të projektit “Fuqizohu dhe përmirësoje jetën tënde”, i financuar nga Fondi i Mirëbesimit të Kombeve të Bashkuara.
Fatime Gërxhaliu, nga QKRH, tha se këto punime përfaqësojnë vetë të mbijetuarat dhe se secili punim ka një histori personale.
Ministrja e Drejtësisë në detyrë, Albulena Haxhiu, theksoi rëndësinë e bashkimit të grave për të arritur përpara dhe për të mbrojtur pavarësinë ekonomike të tyre.
Mirlinda Sada, drejtoreshë e Medica Gjakova, e lavdëroi qëndrueshmërinë e grave, duke thënë se ato tregojnë se jeta mund të lulëzojë sërish.
Atifete Jahjaga, nga Fondacioni “Jahjaga”, theksoi se duar të grave janë të arta dhe se ato japin finesë çdo produkti që krijojnë.
Adelinë Sahiti, drejtoreshë e Shërbimeve Sociale në Prishtinë, ftoi qytetarët të vizitojnë panairin dhe të kontribuojnë financiarisht.
Rozafa Kelmendi, nga “UN Women”, falënderoi të mbijetuarat për qëndresën e tyre dhe shembullin që japin për shoqërinë.
Panairi “Bëhu zëri im” do të hapet gjithashtu në gjashtë komuna të tjera të Kosovës.
