Kryetari i komunës së Prishtinës, Përparim Rama, ka takuar kryetarët e komunave tjera pas situatës së krijuar me mbeturinat. Ai ka theksuar se “në këtë situatë të krijuar, komunat do t`i ndihmojnë njëra-tjetrës sipas nevojës së krijuar”.
Përmes një njoftimi ai ka thënë se ndërmarrja “Pastrimi” ndodhet në një gjendje të rënduar për shkak të keqmenaxhimit të vazhdueshëm dhe mungesës së përgjegjshmërisë së menaxhmentit.
“Komuna e Prishtinës, në koordinim me komunat tjera aksionare, do të ndërmarrë veprime për të ndihmuar në stabilizimin e situatës në ndërmarrje, me synim që të mbrohet mirëqenia e punëtorëve, pagat dhe vendet e tyre të punës dhe të sigurohet funksionimi normal i ndërmarrjes”, ka shkruar Rama në “Facebook”.
Po ashtu, ai ka thënë se komunat do të angazhojnë operatorë privatë për të siguruar vazhdimësinë e mbledhjes së mbeturinave në territoret përkatëse, me qëllim mbrojtjen e shëndetit publik dhe garantimin e një mjedisi të pastër.
Tutje ai ka thënë se komunat kanë shprehur vullnetin e tyre të lirë për të inicuar menjëherë procedurat e decentralizimit të ndërmarrjes, në përputhje me legjislacionin në fuqi.
