Kreu i SPAK, Altin Dumani, deklaroi se operacioni ndërkombëtar antidrogë i koduar “Ura”, i zhvilluar në bashkëpunim me autoritetet italiane, goditi një nga grupet më të fuqishme kriminale shqiptare, të përfshirë në trafikun e drogave të forta dhe pastrimin e parave.
“Ky operacion përfaqëson një hap të rëndësishëm kundër krimit. Nënvizoj se është arritur të goditet një nga grupet kriminele të fuqishme në vend, që ishte i përfshirë në trafikun e ndërkombëtar të drogave të fortave dhe pastrimit të parave”, tha Dumani.
Edhe kryeprokurori i Barit, Roberto Rossi, u shpreh se mafia shqiptare është kthyer në një forcë ndërkombëtare të trafikut të drogës dhe se për ta luftuar duhet bashkëpunim edhe me shtete e tjera ku ajo ndërvepron, jo vetëm mes Shqipërisë dhe Italisë.
“Ky operacion ndërkombëtar kundër mafies dhe trafikut është rezultat i bashkëpunimit mes nesh dhe institucioneve shqiptare. Kemi bashkëpunuar prej 10 vitesh për të luftuar krimin në Shqipëri dhe në Itali. Jemi të ndërgjegjshëm që SPAK janë të aftë ta ndjekin dhe ta hetojnë këtë luftë bashkë me ne. Ky bashkëpunim është shumë i rëndësishëm. Mafia shqiptare është një forcë ndërkombëtare shumë e madhe, por jemi të sigurt që populli shqiptar me anë të institucioneve të drejtësisë do të jetë në gjendje ta luftojë këtë “tumor”. Lufta kundër trafikut të drogës i kalon kufijtë ndërkombëtarë dhe në këtë operacion kemi bashkëpunuar edhe me Europën e Veriut, Amerikën e Jugut dhe vendet e tjera. Ky operacion u realizua se ka pasur një punë të rëndësishme në skuadër”, tha ai.
Nga ana tjetër, përfaqësuesi i Eurojust për Italinë, Gianluca Forlani, tha se bashkëpunimi me SPAK ishte i suksesshëm dhe nuk pati rrjedhje informacioni.
“Për të arritur te flukset ekonomike, pra për të ndjekur paratë përtej kufijve. Kufijtë nuk janë më pengesë se ekziston ky bashkëpunim që na ka lejuar edhe të sekuestrojmë pasuri që janë krijuar në mënyrë të paligjshme. Të gjitha të ardhurat e paligjshme të transportuara në Shqipëri u hetuan me anë të një analize të detajuar. Ne kemi vendosur të ndjekim këto masa në Shqipëri dhe Itali e kemi bërë me një regji ndërkombëtare që lejoi të mos përhapeshin informacionet. Ndajmë të njëjtat rezultate sepse jemi një skuadër e përbashkët që me kohën po perfeksionohet”, tha Forlani.
Operacioni u zhvillua njëkohësisht në Shqipëri dhe Itali, ku u lëshuan 51 urdhërarreste dhe 1 urdhër ndalimi, ndërsa janë ekzekutuar masat për 42 persona. Grupi e kishte bazën në Durrës, por aktiviteti i tij shtrihej në disa shtete europiane dhe në Amerikën e Jugut. Mes të arrestuarve rezultojnë edhe zyrtarë publikë, përfshirë dy efektivë policie dhe një avokat.
Nga hetimet llogaritet se një vlerë prej rreth 5 milionë euro është qarkulluar nga ky grup kriminal, që sillej përmes linjave të autobusëve drejt Shqipërisë.
