Presidentja e shtetit, Vjosa Osmani, nga Zvicra ka thënë të jetë e shqetësuar për vonesat që po ndodhin në konstituimin e Kuvendit të Kosovës, përpjekje të nisura qysh më 15 prill, kur ajo e thirri seancën e parë. Por megjithatë, Osmani tha se nëse krahasohet me vende të ndryshme në Evropë, ka raste kur përpjekjet për krijimin e një koalicioni qeverisës zgjasin me muaj të tërë.
“Me 15 prill është mbajtur seanca e parë e parlamentit ku kanë filluar përpjekjet e para për konstituimin e kuvendit. Tani ka kaluar më shumë se një muaj nga përpjekjet e para në këtë drejtim e fatkeqësisht ende nuk ka sukses. Mirëpo nëse e krahasojmë me vende të ndryshme në Evropë ka raste kur përpjekjet për krijimin e një koalicioni qeverisës zgjasin me muaj të tërë, pra nuk është jashtë normës evropiane. Kjo nuk do të thotë megjithatë se ne nuk shqetësohemi për këto vonesa. Si presidente jam e shqetësuar me këto vonesa, sepse barrën e këtyre vonesave e paguajnë qytetarët e Kosovës”, tha ajo duke iu përgjigjur pyetjeve të gazetarëve në konferencën e përbashkët që pati me homologen e saj zvicerane.
Osmani tha se me mos konstituimin e kuvendit, nuk ka kuvend funksional ku mund të ratifikohen marrëveshjet ndërkombëtare, përfshirë edhe ato që lidhen me Planin e Rritjes së BE-së.
“Por, ka edhe dëme të shumta të cilat ne i bartim si barrë, si qytetarë të Kosovës për shkak të mungesës së kuvendit”.
Megjithatë, Osmani ka shprehur besimin që partitë e përfaqësuara në kuvend do të arrijnë marrëveshje për ta kaluar këtë situatë. “Sepse sa herë e vendosin interesin e shtetit si parësor, gjithmonë zgjidhja politike është afër”, tha tutje ajo.
Osmani: Serbia po bën spastrim etnik ndaj shqiptarëve
Presidentja e shtetit, Vjosa Osmani, ka folur edhe për situatën në Luginë, ku sipas saj Serbia po bën spastrim etnik me mjete administrative.
“Ajo çfarë po ndodhë në Serbi ndaj shqiptarëve është spastrim etnik me mjete administrative, dhe këtë e bëjnë duke i larguar nga listat e votuesve, duke i lënë pa nënshtetësi dhe ka edhe shumë shkelje të të drejtave fundamentale. Tani, siç e dini unë e kam ngritur zërin për këto shkelje nga Këshilli i Sigurimit të OKB-së e deri të Parlamentin Evropian, e këtë e bëjmë vazhdimisht, sepse në Kosovë jemi shembull i mbrojtjes së të drejtave të komunitetit pakicë, por edhe dhënies së të drejtave që është zor të gjinden në shtete të BE-së, përfshirë të drejtën e vetos e shumëçka tjetër. Kurse në Serbi kemi një sistem represiv i cili po vazhdon”, tha tutje Osmani, kur u pyet për këtë çështje.
Presidentja Osmani tha të ketë përkrahur prej më shumë se një dekade reciprocitetin, sepse tha se kjo do të nënkuptonte se aq të drejta sa u jepen pakicave në Kosovë aq duhet t’i jepeshin shqiptarëve që jetojnë në Preshevë, Medvegjë e Bujanoc.
“Kjo është diçka që është refuzuar nga Serbia që nuk ka treguar interesim t’i zbatojë detyrimet ndërkombëtare sa i përket mbrojtjes të të drejtave dhe lirive themelore, por kjo nuk do të thotë se do të ndalemi”, tha tutje Osmani.
Osmani: Kosova e Zvicra ndajnë vlera të përbashkëta
Presidentja e shtetit Vjosa Osmani sërish edhe në konferencën për media i ka shprehur mirënjohjen për pritjen e nderin që tha se sot iu bë shtetit të Kosovës.
“Më lejoni që në emër të të gjithë qytetarëve të Republikës të iu shpreh mirënjohjen më të thellë për pritjen e jashtëzakonshme e nderin e madh që i keni bërë sot shtetit tonë. Po ashtu i falënderoj nga zemra të gjithë qytetarët që e bënë këtë pritje edhe më madhështore në sheshin e Bernit. Kjo vizitë për ne nuk është vetëm historike, është një dëshmi e fuqishme se shtetet e popujt tanë tashmë po shkruajnë një kapitull të ri në marrëdhëniet tona të ndërsjella, marrëdhënie të cilat janë latuar në kohët më të vështira për vendin tonë, në kohën kur Kosovës i duhej më shumë se kurrë përkrahja e aleatëve”, tha Osmani.
