Ministri në detyrë i Mbrojtjes, Ejup Maqedonci, derisa u ka bërë nderime në Landovicë dëshmorëve, tha se operacioni “Shigjeta” i Ushtrisë Çlirimtare të Kosovës, pati rëndësi taktike dhe strategjike, duke përshpejtuar, sipas tij, kapitullimin në terren të forcave të armatosura të Serbisë.
Në akademinë përkujtimore, para bashkëluftëtarëve, miqve dhe familjarëve, Maqedonci thotë se theksoi rëndësinë jetike që kishte ky operacion i cili ishte urdhëruar nga Shtabi i Përgjithshëm i UÇK-së dhe, nga data 26 maj deri më 10 qershor të vitit 1999, për dy javë, rreth 2.000 ushtarë të UÇK-së, luftuan me trupat ushtarake serbe nëpër brezin kufitar.
“Asgjësimi i forcave serbe të dislokuara përgjatë zonës kufitare me Shqipërinë dhe pastrimi i atij territori nga ushtria serbe ishte i domosdoshëm, prandaj operacioni ‘Shigjeta’ duhej të zhvillohej patjetër me saktësi dhe efikasitet të plotë”, tha Maqedonci.
Ai tha se në tokë ushtarët e UÇK-së, ndërsa në ajër avionët e NATO-s, i dërrmuan trupat serbe, që deri në ditët e fundit po i vrisnin refugjatët shqiptarë që vet po i dëbonin në drejtim të Kukësit, Hasit dhe Tropojës.
“Sot falë sakrificës së UÇK-së dhe popullit tonë vendi ynë frymon i lirë dhe i pavarur”, ka thënë Maqedonci.
