Kancelari gjerman tha se një vendim i ngjashëm është marrë edhe nga SHBA-ja, Mbretëria e Bashkuar dhe Franca, i cili do t’i lejonte Kievit të godiste objektiva brenda Rusisë duke përdorur armë perëndimore me rreze të gjatë veprimi.
Kancelari gjerman Friedrich Merz tha se nuk ka më kufizime për Kievin që përdor armë perëndimore me rreze të gjatë veprimi kundër objektivave brenda Rusisë.
Komentet e Merz erdhën pasi Rusia nisi sulme ajrore në shkallë të gjerë në të gjithë Ukrainën për tre netë me radhë .
Merz tha se një vendim i ngjashëm është marrë edhe nga Mbretëria e Bashkuar dhe Franca – si dhe SHBA-të – gjatë WDR Europaforum të së hënës , të organizuar nga mediumi gjerman WDR.
“Nuk ka më asnjë kufizim në gamën e armëve që i janë dorëzuar Ukrainës – as nga pala britanike, as nga pala franceze, as nga pala jonë. Nuk ka asnjë kufizim as nga amerikanët”, tha Merz.
Nuk është e qartë se kur u hoqën kufizimet.
Ish-presidenti amerikan Joe Biden hoqi kufizimet mbi raketat ATACMS të ofruara nga SHBA- ja në fund të dhjetorit , duke i lejuar Kievit të godiste objektiva brenda Rusisë përgjatë kufirit.
Në atë kohë, u spekulua se ndryshimi mund të ndikonte edhe në armë të tjera perëndimore me rreze të gjatë veprimi, siç janë raketat britanike Storm Shadow, përdorimi i të cilave kërkon autorizimin e Uashingtonit, pasi ato përdorin elementë të teknologjisë amerikane të mbuluar nga Rregulloret Ndërkombëtare të Trafikut të Armëve (ITAR) të Uashingtonit.
Merz shtoi të hënën se ka kufizime se ku mund të godasë Kievi, pa dhënë hollësi.
Aktualisht, Gjermania nuk i ka furnizuar Kievit raketat e saj Taurus ose ndonjë armë me rreze të gjatë veprimi. Merz tha gjithashtu javën e kaluar se marrëveshjet e ardhshme të armëve me Kievin nuk do të publikohen, sipas New Voice Ukraine .
Por Merz, përpara se të merrte rolin e kancelarit në fillim të majit, ka shprehur gatishmëri për të dërguar raketa Taurus në Ukrainë.
Duke komentuar mbi bisedimet e fundit të paqes midis Kievit dhe Moskës që dështuan të siguronin një armëpushim, Merz tha se udhëheqësi rus Vladimir Putin “padyshim i sheh ofertat për bisedime si një shenjë dobësie”.
“Pas tre javëve të fundit, askush nuk mund të na akuzojë seriozisht se nuk i kemi shteruar të gjitha mjetet diplomatike në dispozicion”, tha Merz.
Merz tha se Kievi dhe mbështetësit e tij kanë “bërë gjithçka” që mundën – përveç “ngritjes së flamurit të bardhë”.
“Nëse edhe një ofertë për t’u takuar në Vatikan nuk merr miratimin (e Putinit), atëherë duhet të jemi të përgatitur që kjo luftë të zgjasë më shumë nga sa dëshirojmë ose mund ta imagjinojmë të gjithë”, tha ai, duke iu referuar hezitimit të Kremlinit në lidhje me bisedimet e propozuara të paqes që do të mbahen nga Vatikani.
Merz më parë u zotua për më shumë sanksione ndaj Moskës nëse kjo e fundit refuzon ultimatumin e armëpushimit të Perëndimit.
