Zyrtarët amerikanë dhe gjermanë do të diskutojnë fazën tjetër të mbështetjes për Ukrainën dhe sanksionet e reja kundër Rusisë në Uashington këtë javë, duke përfshirë heqjen e mundshme të kufizimeve të rrezes së veprimit për sulmet ukrainase me armë perëndimore brenda Rusisë.
Shtetet e Bashkuara ende nuk i kanë hequr të gjitha kufizimet e epokës së Joe Biden mbi përdorimin e armëve perëndimore nga Ukraina, por Presidenti Donald Trump po e “shqyrton seriozisht” këtë mundësi, i thanë dy zyrtarë të lartë perëndimorë korrespondentit të Kyiv Post në Uashington.
“Të gjitha kufizimet e vendosura më parë – qofshin tashmë të lehtësuara apo jo – janë aktualisht nën shqyrtim sepse Presidenti Trump beson se status quo-ja aktuale nuk kontribuon në qëllimin e përbashkët për ta sjellë Rusinë në tryezën e negociatave”, tha njëri nga zyrtarët, pa dhënë detaje të mëtejshme.
Ukraina deri më tani ka marrë një numër raketash me rreze të gjatë veprimi nga SHBA-ja, Mbretëria e Bashkuar dhe Franca – duke përfshirë ATACMS, Storm Shadow dhe SCALP – por fillimisht iu lejua t’i përdorte ato vetëm kundër forcave ushtarake ruse në territoret e pushtuara ukrainase. Vetëm në fund të vitit 2024 administrata e Presidentit të SHBA-së, Joe Biden, dhe aleatëve të tjerë i lehtësuan këto kufizime, duke i lejuar Ukrainës të përdorte raketa me rreze të gjatë veprimi kundër objektivave ushtarake ruse në rajonet kufitare. Trump shpesh e ka kritikuar vendimin e Bidenit për të lehtësuar kufizimet.
Merz: Nuk ka më kufizime
Kancelari gjerman Friedrich Merz tha dje se nuk ka më kufizime në distancën e veprimit për armët e furnizuara Ukrainës nga aleatët perëndimorë, që do të thotë se Kievi tani mund të godasë objektiva ushtarake brenda Rusisë. Kremlini e quajti këtë veprim “të rrezikshëm”. Deklarata e Merz erdhi pas një nate të tretë radhazi, gjatë së cilës dronët dhe raketat ruse sulmuan objektiva në të gjithë Ukrainën.
Trump kritikoi presidentin rus të dielën, duke thënë në mediat sociale se Putini ishte “çmendur plotësisht… dhe po vriste pa nevojë një numër të madh njerëzish”. Kremlini u përgjigj se Trump po tregonte shenja të “mbingarkesës emocionale”.
Takimi i kësaj jave
Një zyrtar perëndimor i tha gazetës Kyiv Post të hënën në mbrëmje se vendimi përfundimtar i Trump për sanksionet kundër Rusisë, si dhe një fazë e re e mbështetjes së SHBA-së për Ukrainën, do të diskutohen nga zyrtarët amerikanë dhe gjermanë gjatë takimeve në Uashington këtë javë.
Sipas të njëjtit burim, Ministri i Jashtëm gjerman Johann Wadephul planifikon të vizitojë kryeqytetin e SHBA-së në ditët në vijim. Wadephul tha në emisionin e së hënës në Tagesschau se Putini “nuk dëshiron paqe, por të vazhdojë luftën – dhe ne nuk duhet ta lejojmë ta bëjë këtë”.
Ai shtoi se partnerët evropianë tashmë po përgatisin një paketë të re sanksionesh. “Patjetër që do të ketë një reagim nga Perëndimi, dhe besoj edhe nga Shtetet e Bashkuara”, tha Wadephul.
Mbetet e paqartë nëse Wadephul do të mbështetet në njoftimin e Merz në lidhje me aftësinë e sulmeve me rreze të gjatë veprimi të Ukrainës gjatë takimeve të tij me ekipin e Trump, por analistët ushtarakë, si Jorge Rivera, një ekspert me bazë në Uashington për Rusinë dhe Ukrainën, tashmë po diskutojnë pasojat e mundshme të këtij veprimi.
Analisti: Një vendim që do të ndryshonte luftën
Në një intervistë me Kyiv Post, Rivero tha se lehtësimi i mundshëm i kufizimeve perëndimore mbi përdorimin e armëve me rreze të gjatë veprimi do të përfaqësonte një ndryshim të rëndësishëm në dinamikën operative dhe strategjike të luftës. “Lehtësimi i kufizimeve do t’i lejonte Ukrainës të synonte objektet ushtarake brenda territorit rus, duke përfshirë bazat ajrore nga të cilat lëshohen dronët Geran-2 dhe bombarduesit strategjikë që kryejnë sulme të vazhdueshme në qytetet ukrainase”, tha ai.
“Ky ndryshim politikash mund t’u mundësojë më tej forcave ukrainase të sulmojnë postet komanduese ruse dhe rrugët logjistike thellë brenda Rusisë me municione të drejtuara me precizion”, shtoi ai.
Kufizimet perëndimore mbi përdorimin e armëve të përparuara deri më tani kanë mbrojtur në mënyrë efektive infrastrukturën kyçe ushtarake ruse dhe linjat e furnizimit nga sulmet ukrainase. “Heqja e këtyre kufizimeve mund ta përmbysë qasjen aktuale dhe t’i lejojë Ukrainës të prishë sistemet logjistike dhe operacionale që mbështesin operacionet e luftës ruse”, tha Rivero.
“Një zhvillim i tillë ka shumë të ngjarë të ndërlikojë më tej planifikimin rus dhe të kërcënojë stabilitetin e linjave të furnizimit që Moska ka përdorur që nga fillimi i pushtimit në vitin 2022.”
