Shoqata e Prokurorëve të Kosovës ka reaguar ndaj deklaratave publike të bëra nga zyrtarë të subjektit politik GUXO dhe të Qeverisë së Kosovës, pas veprimeve procedurale të Prokurorisë Speciale që përfshinin intervistimin e një zyrtari të lartë, sipas tyre, në cilësinë e të dyshuarit për çështje korrupsioni.
Shoqata thotë se e konsideron të papranueshme gjuhën denigruese dhe akuzat e drejtuara ndaj kryeprokurorit Blerim Isufaj dhe prokurorit Admir Shala, duke theksuar se prokurorët e Republikës së Kosovës veprojnë në përputhje me Kushtetutën, ligjet në fuqi dhe provat që rezultojnë nga hetimet.
“Tentativat për diskreditim personal dhe përmendja e përkatësive të mëhershme politike nuk guxojnë të përdoren si mjet presioni ndaj prokurorëve, të cilët janë të obliguar të veprojnë në mënyrë të pavarur dhe profesionale”, thuhet në reagim.
Shoqata rikujton se vlerësimi i punës së një prokurori duhet të bëhet mbi bazën e performancës profesionale, respektimit të ligjit dhe etikës, e jo mbi baza politike.
Në fund, Shoqata u bën thirrje të gjithë aktorëve publikë të përmbahen nga deklaratat që synojnë të ndikojnë në pavarësinë e sistemit prokurorial dhe thekson se do të vazhdojë të mbështesë prokurorët që veprojnë me integritet dhe në përputhje me ligjin.
