Policia e Kosovës ka konfirmuar se sot, rreth orës 02:20 të mëngjesit, ka ndodhur një aksident trafiku me pasoja fatale në fshatin Pavlan të Pejës.
Sipas informatave të para, një veturë që dyshohet se ishte duke qarkulluar me shpejtësi të madhe në drejtim të qytetit të Pejës, ka humbur kontrollin, është rrokullisur dhe ka përfunduar jashtë rrugës, në një fushë. Si pasojë e aksidentit, automjeti është përfshirë nga flakët së bashku me personin që ndodhej brenda tij, njofton Driton Rugova, zëdhënës i Policisë për rajonin e Pejës.
Bëhet e ditur se në vendin e ngjarjes kanë dalë njësitet përkatëse të Policisë, ekipi i zjarrfikësve dhe ai mjekësor, të cilët kanë konstatuar vdekjen e viktimës në vendngjarje.
Me urdhër të prokurorit të shtetit, trupi i pajetë i viktimës është dërguar në Institutin e Mjekësisë Ligjore në Prishtinë për obduksion.
